RDC ge edhumah ameenee magu ge gasthah kandah fashaifi

އާރުޑީސީގެ އެދުމަށް އަމީނީ މަގުގެ ގަސްތައް ކަނޑަން ފަށައިފި

19 Sep 2022 | 05:46

އަމީނީ މަގުގައި ހުރި ގަސްތައް ކަނޑަނީ -- ފޮޓޯ: ޓުވިޓާ

ރޯޑް ޑިވެލޮޕްމަންޓު ކޯޕަރޭޝަން (އާރުޑީސީ) ގެ އެދުމަށް އަމީނީ މަގުގައި ހުރި ގަސްތައް މާލޭ ސިޓީ ކައުންސިލުން ކަނޑަން ފަށައިފިއެވެ.

މި މައްސަލައިގައި އާންމު ފަރާތަކުން ކަންބޮޑުވުން ފާޅުކޮށް މާލޭ ސިޓީ ކައުންސިލުގެ މޭޔަރު ޑރ. މުހައްމަދު މުއިއްޒު ޓެގް ކުރުމުން އެބޭފުޅާ ވިދާޅުވެފައިވަނީ ސިޓީ ކައުންސިލުގެ މުވައްޒަފުން މަސައްކަތް ކުރަމުން ގެންދަނީ އަމީނީ މަގު ހެދުމުގެ މަސައްކަތް ކުރާ ފަރާތް ކަމަށްވާ އާރުޑީސީ އިން އެކަމަށް އެދުމުން ކަމަށެވެ.

"އަމީނީ މަގު ހަދާ ފަރާތުން ގަސް ނަގައިދޭން އެދޭތީ، މަގު ހެދުމުގެ މަޝްރޫއަށް އެއްބާރުލުން ދިނުމުގެ ގޮތުން (ގަސް ކެނޑުމުގެ މަސައްކަތް ކުރަމުން ދަނީ)" މޭޔަރު މުއިއްޒު ވިދާޅުވެފައިވެއެވެ.

ތަރައްގީގެ މަޝްރޫއުތަކަށް، ހާއްސަކޮށް މަގު ހެދުމުގެ މަޝްރޫއުތަކުގެ ދަށުން ގަސް ކެނޑުމަކީ އާންމު ކަމެއް ނަމަވެސް އެއީ އަބަދުވެސް އާންމުންނާއި ތިމާވެއްޓަށް ލޯބިކުރާ ގިނަ ފަރާތްތަކެއްގެ ކަންބޮޑުވުމާއި ފާޑުކިޔުން ލިބޭ ކަމެއް ކަން ފާހަގަ ކޮށްލެވެއެވެ.

ސަރުކާރުގެ ބަޖެޓުން 84 މިލިއަން ރުފިޔާ ހަރަދުކޮށްގެން އާރުޑީސީ އާއި އަމީނީ މަގުގެ މަސައްކަތް ހެދުމުގެ މަޝްރޫއު ހަވާލުކޮށްފައިވަނީ 210 ދުވަހުގެ ތެރޭގައި ނިންމާ ގޮތަށެވެ. މި މަޝްރޫއުގެ ދަށުން އަމީނީ މަގުގައި ތާރު އަޅާ ތަރައްގީ ކުރުމަށް ވަނީ ނިންމާފައެވެ.

ހަބަރު

ރައީސް ޑޮކްޓަރ މުޙައްމަދު މުޢިއްޒު