ގއ. އަތޮޅުގައި ދަތުރުކުރާ ފެރީއަކުން މޫދަށް ވެއްޓި ޒުވާނަކު މަރުވެއްޖެއެވެ. 

މައުލޫމާތު ލިބޭ ގޮތުގައި އެމްޓީސީސީއިން ގއ އަތޮޅުގައި އޮޕަރޭޓްކުރާ މި ފެރީގައި މަސައްކަތް ކުރާ މި ޒުވާނާ ފެރީއިން ވެއްޓިފައިވަނީ ގއ. ގެމަނަފުށިން ފުރައިގެން ގއ. ކަނޑުހުޅުދުއަށް ދަތުރުކޮށް އެ ރަށުގެ ނެރުކައިރިންނެވެ.

މި ހާދިސާގައި މަރުވެފައިވަނީ ކަނޑުހުޅުދޫ ހީނާމާގެ، އިރުފާން އަލީ، 25 އެވެ.

މައުލޫމާތު ލިބޭ ގޮތުގައި ޒުވާނާ ފެރީއިން ވެއްޓުނު އިރު އޭނާ ހުއްޓިގެން ހުރީ ފެރީގެ ދިރުނބާ ކޮޅުގައި ބަޔަކާއި ވާހަކަ ދެއްކުމަށެވެ. އޭނާ ފެރީއިން ވެއްޓުނު ސަބަބެއް ސާފުވެފައެއް ނުވެއެވެ.

އިއްޔެ ހަވީރު ހިނގި މި ހާދިސާގައި އިރުފާނު ފެރީއިން ވެއްޓުމާއި އެކު ފެރީ މަޑުކޮށް 10 ވަރަކަށް މިނަޓު ތެރޭ އޭނާ ހޯދި ނަމަވެސް ހޮސްޕިޓަލާއި ހަމައަށް އޭނާ ގެންދިޔަ އިރުވެސް މަރުވެފައިވާ ކަމަށް މައުލޫމާތު ލިބެއެވެ.