ފަސް ރަށެއްގެ މެޖިސްޓްރޭޓް ކޯޓަށް ފަނޑިޔާރުން ހޯދަން ޖުޑިޝަލް ސާރވިސް ކޮމިޝަނުން އިއުލާންކޮށްފިއެވެ.

ޖޭއެސްސީން މިއަދު ކުރި އިއުލާނެއްގައި ވަނީ ނ. ވެލިދޫ، ޅ. ހިންނަވަރު، ގދ. ތިނަދޫ، ގދ. ފަރެސްމާތޮޑާ އަދި ގއ. ގެމަނަފުށްޓަށް މެޖިސްރްރޭޓުން ހޯދާށެވެ.

މި މަގާމްތަކަށް އެދޭ ފަރާތްތަކުން އަންނަ އޮކްޓޫބަރު މަހުގެ 3 ވަނަ ދުވަހުގެ ކުރިން ޖޭއެސްސީއަށް ލިޔެކިޔުން ހުށަހެޅުމަށް ޖޭއެސްސީން ވަނީ އެދިފައެވެ. އަދި ފަނޑިޔާރުކަމަށް އެދި ހުށަހަޅާ ފޯމާއި ލިޔުންތައް ހުށަހަޅަން ބޭނުންވާ ފަރާތްތަކަށް ކޮމިޝަނުގެ ރަސްމީ އީމެއިލް އެޑްރެހަށް [email protected] ފޮނުއްވުމަށްވެސް އިއުލާނުގައި ބުނެފައިވެއެވެ.

މެޖިސްޓްރޭޓް ކޯޓުގެ ފަނޑިޔާރެއްގެ މުސާރައިގެ ގޮތުގައި 21،000 ރުފިޔާ ލިބޭއިރު، ލިވިން އެލަވަންސާ ފޯނު އެލަވަންސް އަދި މެޑިކަލް އިންޝޫރެންސް ލިބޭނެއެވެ. މެޖިސްޓްރޭޓަކަށް ވެވޭނީ އުމުރުން 25 އަހަރުން މަތީގެ މީހުންނަށެވެ.