ރައްޔިތުން މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއަށް ހާޒިރުވުން ލަސްވި ސަބަބު ޓްރާންސްޕޯޓް މިނިސްޓަރު ޢާއިޝަތު ނަހުލާ މިއަދު ވިދާޅުވެއްޖެއެވެ.

ޤައުމީ ތަރައްޤީއާއި ތަރިކައިގެ ކޮމިޓީން މިދިޔަ ބުދަ ދުވަހުގައި ތާވަލުކުރި ބައްދަލުވުމަށް ނަހުލާ ހާޒިރުވެވަޑައިގަތީ ގަޑި ޖެހުނު ފަހުންނެވެ. މިނިސްޓަރ ނަހުލާ ވަޑައިނުގަތުމުން ކޮމިޓީ ހޫނުވެ ބައްދަލުވުން ވަނީ މެދުކަނޑާލާފައެވެ.

ޓްރާންސްޕޯޓް މިނިސްޓްރީގެ ބޭފުޅުން އޭރު ވިދާޅުވީ މިނިސްޓަރު ހާޒިރުވުން ލަސްވީ ކުއްލި ކަމެއް ދިމާވުމުން ކަމަށެވެ.
މިއަދު ކޮމިޓީއަށް ހާޒިރުވެވަޑައިގެން ކޮމިޓީ ނިންމައިލި ވަގުތު ނަހުލާ ވިދާޅުވީ ދިމާވި ހާލަތަކާ ގުޅިގެން ހާޒިރުވުން ލަސްވާނެކަމަށް އެ ދުވަހު އަންގާފައިވާނެ ކަމަށާއި, ހާޒިރުވުން ލަސްވީ މައްސަރު ކަންތައް ދިމާވުމުން ކަަމަށެވެ.

Advertisement

"އަޅުގަނޑު ގަޑިއަށް ހާޒިރުވާއިރު، ވަޒީރެއްގެ ކުރިން، އަޅުގަނޑަކީ އިންސާނަކަށް ވީތީ، އަންހެނަކަށް ވީތީ ދިމާވެދާނެ ހާލަތެއް އޮވެދާނެ. އެގޮތުން އަންހެނުންނަކީ ކޮންމެ މަހަކު އެއް ފަހަރު މައްސަރު ކަން ލައިގަންނަ ބައެއް ވީމާ، އެހެންވީމަ އަޅުގަނޑު ކުޑަކޮށްވެސް އިހުތިރާމު ކުޑަކުރުމުގެ ގޮތުން މަޖިލީހަށް ލަހުން އައީކީ ނޫން."މިނިސްޓަރ ވިދާޅުވިއެވެ.

މިނިސްޓަރ ނަހުލާ ވަނީ ހާޒިރުވާން ލަސްވީތީ އެކަމަށް މައާފަށްވެސް އެދިފަ އެވެ. މިނިސްޓަރ ވިދާޅުވީ، އެވާހަކަ ހިއްސާކުރެއްވީ އެ ކޮމިޓީގެ ތެރޭގައި އެކަމާ ގުޅިގެން ހިތްހަމަނުޖެހުން ފާޅުކުރުމުން ކަމަށެވެ. 

މިނިސްޓަރު ކޮމެޓީއަށް ގަޑިއަށް ވަޑައިނުގަތުމުން މިދިޔަ ބުދަ ދުވަހު ބޭއްވި ކޮމިޓީ ޖަލްސާގައި ބައެއް މެމްބަރުން ވަނީ ހާޒިރުކުރުމުގެ އަމުރެއް ނެރެގެން ނަމަވެސް ނަހުލާ ކޮމެޓީއަށް ހާޒިރު ކުރަންޖެހޭނެ ކަމަށް ވިދާޅުވެފަ އެވެ.