މި މަހުގެ 8 ވަނަ ދުވަހު އަވަހާރަވި އިނގިރޭސިވިލާތުގެ ރާނީ އެލިޒަބަތު ދެވަނައިގެ ޖަނާޒާ ބާއްވައިފިއެވެ. 

އިނގިރޭސި ތަހުތުގައި 70 އަހަރު ހޭދަކުރެއްވުމަށްފަހު ސްކޮޓްލޭންޑުގެ ބަލްމޯރަލް ކާސަލްގައި އަވަހާރަވި ރާނީ އެލިޒަބަތުގެ ޖަނާޒާ ބާއްވާފައިވަނީ އިނގިރޭސި ވެރިރަށް ލަންޑަންގައި ހުންނަ ވެސްޓްމިންސްޓާ އަބޭ ފައްޅީގައެވެ. މި ފައްޅިއަކީ އިނގިރޭސި ތަހުތައް އިސްވެވަޑައިގަންނަވާ ރަސްކަލުންނާއި ރަނިކަނބަލުން ތަހުތާއި ހަވާލުވެ ލެއްވުމުގެ ދިގު ތާރީހެއް އޮތް ފައްޅިއެކެެވެ. މީގެ 70 އަހަރު ކުރިން ރާނީ އެލިޒަބަތު އިނގިރޭސި ތަހުތާއި ހަވާލުވެވަޑައިގަތީވެސް މި ފައްޅީގައެވެ.

ރާއްޖޭގެ ގަނޑިން މިއަދު މެންދުރުފަހު 3:00 ގައި ފެށުނު މި ރަސްމިއްޔާތުގައި ދުނިޔޭގެ އެކި ގައުމުތަކުގެ ވެރިން ވަނީ ބައިވެރިވެވަޑައިގެންފައެވެ. އެގޮތުން އެމެރިކާގެ ރައީސް ޖޯ ބައިޑަން، އުރުދުންގެ ރަސްގެފާނާއި ރާނީގެ އިތުރުން ޖަޕާނުގެ އެމްޕެރާ އަދި ދިވެހިރާއްޖޭގެ ރައީސުލްޖުމްހުރިއްޔާ އިބްރާހިމް މުހައްމަދު ޞާލިހްގެ ދެކަނބަލުންވެސް ވަނީ ޖަނާޒާގައި ބައިވެރިވެވަޑައިގެންފައެވެ. 

ރާނީގެ ޖަނާޒާގައި ދައުވަތުގެ ދަށުން 2000 ފަރާތަކުން ބައިވެރިވިއިރު، ސަލާމާތީ ސަބަބުތަކަށްޓަކައި އެ ފަރާތްތަކުން ވެސްޓްމިންސްޓާ އަބޭ ފައްޅިއަށް ދަތުރުކޮށްފައިވަނީ އިނގިރޭސި ސަރުކާރުން ހަމަޖައްސައިދެއްވި ބަސްތަކުގައެވެ. 

މިއަދުގެ ޖަނާޒާއަށްފަހު ރާނީގެ ސަންދޯއް ގެންދިއުމަށް ހަމަޖެހިފައިވަނީ ވިންޑްސާ ކާސްލް އަށެވެ. އެތަނުގައި ބޭއްވޭ ސިއްރު ޖަނާޒާއަކަށްފަހު ރާނީގެ ސަންދޯއް ވަޅުލުމަށް ހަމަޖެހިފައިވަނީ ސެއިންޓް ޖޯޖަޒް ޗޭޕަަލް ތެރޭގައި ހުންނަ ކިންގް ޖޯޖް ހަ ވަނަ މެމޯރިއަލް ޗޭޕަލްގައެވެ. ރާނީގެ ބައްޕާފުޅުގެ ސަންދޯއް ކައިރީގައި އެކަމަނާގެ ސަންދޯއް ވަޅުލެވޭއިރު މިދިޔަ އަހަރު އަވަހާރަވި ރާނީގެ ފިރިކަލުން ފިލިޕްގެ ސަންދޯއް ވެސް ރޯޔަލް ވޯލްޓުން ނަގައި، ރާނީއާ އެކު ވަޅުލެވޭނެއެވެ.