މެކްސިކޯގެ ދެކުނު ހުޅަނގުގެ މިޗޯއާކަން ސްޓޭޓަށް ރެކްޓާ މިންގަނޑު 7.6 މެގްނިޓިއުޑްގެ ބިންހެލުމެއް އައިސް 10 ގައުމަކަށް ސުނާމީގެ އިންޒާރު ދީފިއެވެ. 

މި ބިންހެލުމާއި ގުޅިގެން ޕެސިފިކް ސުނާމީ ވޯނިންގ ސެންޓަރުން ބުނެފައިވަނީ 3 މީޓަރަށް އަރާފައިވާ ސުނާމީގެ ރާޅުތައް މެކްސިކޯއަށް އަރާފާނެ ކަމަށެވެ. ބެލެވޭ ގޮތުގައި ސުނާމީގެ ފުރަތަމަ ރާޅުތައް މިހާރުވެސް ވަނީ މަންޒަނިލޯ އާއި އަކަޕުލްކޯ ފަދަ އައްސޭރިފަށުގެ ސަރަހައްދުތަކަށް އަރާފަައި ކަމަށް ރިޕޯޓުތައް ބުނެއެވެ. އަދި މަޝްހޫރު ޓުއަރިސްޓް އަވަށް ޕޮއެޓްރޯ ވަލަރްޓާއަށްވެސް ސުނާމީ އަރާނެ ކަަމަށް ބެލެވޭ ކަމަށް ބުނެފައިވެއެވެ.

މެކްސިކޯގެ އިތުރުން ދެން ސުނާމީގެ އިންޒާރުދިން 9 ގައުމަށް އަރާނެ ކަަމަށް ބެލެވެނީ 0.3 މީޓަރު އުސްމިނުގެ ސުނާމީ ރާޅުތަކެއް ކަމަށްވެސް ޕެސިފިކް ސުނާމީ ވޯނިންގ ސެންޓަރުން ވަނީ ބުނެފައެވެ. އެ 9 ގައުމަކީ ކޮލަމްބިއާ، ކޮސްޓަރިކާ، އިކުއެޑޯ، އެލް ސަލްވަޑޯ، ގުއަޓެމާލާ، ހޮންޑިއުރާސް، ނިކަރާގުއާ، ޕެނަމާ އަދި ޕެރޫއެވެ. މި ގައުމުތަކުގެ ޕެސިފިކް އައްސޭރި ހިސާބުތަކަށް ސުނާމީ އަރާނެ ކަމަށް ލަފާ ކުރެވެއެވެ.

Advertisement

މި ބިންހެލުން އައިސްފައިވަނީ މިޗޯއާކަން ސްޓޭޓުގެ ޕެސިފިކް އައްސޭރިފަށާއި ކައިރި ސަރަހައްދަކަށެވެ. އަދި މި ބިންހެލުމުގެ އަސަރު މެކްސިކޯ ސިޓީއަށްވެސް ކޮށްފައިވާކަމަށް ވެއެވެ.