ތިމާވެށީގެ މަޝްރޫއުތައް ހިންގުމަށްޓަކައި، ތިމާވެއްޓަށް އަސަރު ފޯރާނެ ވަރު ބަޔާންކުރާ ރިޕޯޓް (އީއައިއޭ) ހުށަހަޅާއިރު، ގިނަ ރަށްރަށަށް އެއް ރިޕޯޓެއް ހުށަހަޅާ މައްސަލަ ބޮޑުވެ، އެކަން ހުއްޓުވުމަށް އީޕީއޭން މިއަދު ގަވައިދު އިސްލާހުކޮށްފިއެވެ.
އީޕީއޭން ކުރި އިއުލާނެއްގައި ބުނީ، އެއް ރަށަށް ވުރެ ގިނަ ރަށްރަށުގައި ތަރައްގީގެ ގިނަ މަޝްރޫއުތަކެއް ހިންގުމަށް އެއް އީއައިއޭއެއްގެ ދަށުން މަޝްރޫއުތައް ކުރިއަށް ގެންދިއުމަށް އެދި ހުއްދަ ހޯދަން ހުށަނޭޅުމަށް ތިމާވެށީގެ ކޮންސަލްޓަންޓުންނަށް މިހާރު އަންގާފައިވާ ކަމަށެވެ.
އީޕީއޭން ބުނީ މިބަދަލު ގެންނަން ޖެހުނީ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓު ހެދުމާ ބެހޭ ގަވާއިދުގެ ބައެއް މާއްދާތައް ތަންފީޒު ކުރުމުގައި އެއިދާރާ އަށް ގޮންޖެހުންތަކާ ކުރިމަތިވަމުން ދާތީ ކަމަށެވެ.
އީޕީއޭން ބުނީ އެ އިސްލާހާއެކު، އެއް ރަށަށް ވުރެ ގިނަ ރަށްރަށުގައި ހިންގާ ތަރައްގީގެ މަޝްރޫއުތައް، އެއް އެޕްލިކޭޝަން ފޯމަކުން، އެ ހުރިހާ ރަށެއް ހިމެނޭ ގޮތަށް އެއް އީއައިއޭއެއްގެ ގޮތުގައި ހުށަހަޅާފައިވާ ނަމަ، އެފަދަ އެޕްލިކޭޝަންތައް ބާތިލް ކުރާނެ ކަމަށެވެ. އީޕީއޭން ވަނީ މިދިޔަ މަހުގެ 23 އިން ފެށިގެން އެ އިސްލާހަށް އަމަލުކުރަމުންނެވެ.
Advertisement
This content is created and paid for by advertisers and does not involve Voice Journalists
