މާލެ ސަރަހައްދުން ބިންވެރިޔާ ސްކީމްގެ ދަށުން ގޯތި އަދި ގެދޮރުވެރިޔާ ސްކީމްގެ ދަށުން ފްލެޓަށް އެދުމުގެ މުއްދަތު 15 އޮކްޓޯބަރު ގެ ނިޔަލަށް އިތުރުކޮށްފިއެވެ. 

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން މިއަދު ނެރުނު އިއުލާނެއްގައި ބުނެފައިވަނީ "ގެދޮރުވެރިން ޕޯޓަލް" މެދުވެރިކޮށް މި ދެ ސްކީމްގެ ދަށުން ގޯއްޗާއި ފްލެޓަށް އެދި ފޯމު ހުށަހެޅުމުގެ މުއްދަތު އަންނަ އޮކްޓޯބަރު މަހުގެ 15 ވަނަ ދުވަހުގެ ރޭ 12:00 ގެ ނިޔަލަށް އިތުރު ކޮށްފި ކަމަށެވެ. 

ފްލެޓާއި ގޯއްޗަށް އެދުމުގެ ފަހު ތާރީހެއްގެ ގޮތުން ކުރިން އޮތީ މި މަހުގެ 26 ވަނަ ދުވަހެވެ. ހައުސިން މިނިސްޓްރީގެ އިއުލާނުގައި މުއްދަތު އިތުރުކުރި ވަކި ސަބަބެއް ބަޔާންކޮށްފައެއް ނުވެއެވެ. ފާހަގަކޮށްލެވޭ ގޮތުގައި މި މަހުގެ 15 ވަނަ ދުވަހު އެ މިނިސްޓްރީއިން ވަނީ ބިންވެރިޔާ ސްކީމްގެ ދަށުން ގޯއްޗަށް އެދި ހުށަހަޅާ ފަރާތްތަކުގެ ތެރެއިން މާލޭ މީހުންގެ ގޮތުގައި ބަލާ މިންގަނޑަށް ވަނީ ބަދަލު ގެނެސްފައެވެ.

އެގޮތުން ކުރިން މާލޭ މީހުންގެ ގޮތުގައި ބެލޭނީ މާލެ ނޫން އެހެން ތަނެއްގައި މީގެ ކުރިން ދުވަހަކު ވެސް ރެޖިސްޓްރީ ކޮށްފައި ނުވާ މީހުން ކަމުގައި އޮތް އޮތުން ވަނީ ބަދަލުކުރެވިފައެވެ. މިހާރު މި ސްކީމްގެ ދަށުން މާލޭ މީހުންގެ ގޮތުގައި ބެލޭނީ ބަލާނީ މީގެ ކުރިން އެހެން ތަނެއްގައި ރެޖިސްޓްރީ ވެފައި ނުވާ މީހުންނާއި މަންމަ ނުވަތަ ބައްޕައަކަށް މާލޭ މީހަކަށް ވެފައި، ސަރުކާރެއްގެ ސިޔާސަތެއް ނުވަތަ ގަވައިދެއްގެ ސަބަބުން ރެޖިސްޓްރީ ބަދަލުކުރަން ޖެހުނު މީހުންނެވެ.

މި ދެ ސްކީމްގެ ދަށުން މާލެ ސަރަހައްދުގެ ހުޅުމާލެއާއި ގުޅީފަޅުން 5،000 ގޯއްޗާއި 4،000 ފްލެޓު ދިނުމަށް ސަރުކާރުން ވަނީ ނިންމާފައެވެ.