ޓޫރިޒަމް ގާނޫނަށް 12 ވަނަ އިސްލާހު ގެނައުމުގެ ބިލު ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރައްވައިފިއެވެ. 

ދިވެހިރާއްޖޭގެ ޓޫރިޒަމާބެހޭ ގާނޫނަށް 12 ވަނަ އިސްލާހު ގެނައުމުގެ ގާނޫނަށް ގެނައި މައިގަނޑު އިސްލާހަކީ، އެ ޤާނޫނުގެ 11 ވަނަ އިސްލާހުގައި ރާއްޖޭގައި ހޭދަކުރާ ކޮންމެ ދުވަހަކަށް، ޓޫރިސްޓުންގެ އަތުން ނެގޭނެކަމަށް ބަޔާންކޮށްފައިވާ ގްރީން ޓެކްސް ނެގުން 1 ޖަނަވަރީ 2023 އިން ފެށިގެން ނެގުމަށް އޮތް އޮތުން މިހާރުން ފެށިގެން ވެސް ނެގޭނެގޮތަށް މަގުފަހިކޮށްދިނުމެވެ.

މީގެ އިތުރުން ވެސް މި ގާނޫނަށް 12 ވަނަ އިސްލާހު ގެނައުމުގެ ގާނޫނަށް އަމަލުކުރަން ފެށުމާ ހަމައަށް ހިނގާފައިވާ މުއްދަތުގެ ތެރޭގައި، ގްރީން ޓެކްސްގެ ގޮތުގައި އެއްވެސް ފަރާތެއްގެ އަތުން ފައިސާ ނަގާފައިވާނަމަ، އެ ފައިސާ އެފަރާތަކަށް އަނބުރާނުދައްކާހާ ހިނދަކު، އެ ޓޫރިސްޓަކު ހުރި ތަނެއް ހިންގާ ފަރާތުން އެ ފައިސާ ދައުލަތަށް ދައްކަންވާނެކަމަށާއި، ގްރީން ޓެކްސް، މި ޤާނޫނުގައި ބަޔާންކުރާ ފަރާތެއް ފިޔަވައި އެހެން ފަރާތެއްގެ އަތުން ނަގާފައިވާނަމަ، ނުވަތަ ނަގަންޖެހޭ އަދަދަށްވުރެ އިތުރަށް އެއްވެސް ފަރާތެއްގެ އަތުން ގްރީން ޓެކްސްގެ ގޮތުގައި ފައިސާ ނަގާފައިވާނަމަ، އެ ފައިސާ އެފަރާތަކަށް އަނބުރާނުދައްކާހާ ހިނދަކު، އެ ޓޫރިސްޓަކު ހުރި ތަނެއް ހިންގާ ފަރާތުން އެ ފައިސާ ދައުލަތަށް ދައްކަންވާނެކަމުގައި ވަނީ ބަޔާންކޮށްފައެވެ.

ޓުއަރިޒަމާއި ބެހޭ ގާނޫނަށް ކައިރި ކައިރީގައި އިސްލާހު ހުށައަޅުއްވަން ޖެހުނީ މީގެ ކުރިން މަޖިލީހުން ފާސްކުރި ބިލުގައި ގްރީން ޓެކްސް ނަގަން ފަށަން ޖެހޭ ތާރީހެއްގެ ގޮތުގައި އަންނަ އަހަރުގެ ޖެނުއަރީ މަހުން ފެށިގެން އޮތުމުންނެވެ. އަދި އެ ބިލު ފާސްކޮށް ރައީސް ސޯލިހު ތަސްދީގު ކުރެއްވުމާއި ގުޅިގެން ދައުލަތަށް ލިބެންޖެހޭ ޓެކްސް ނުލިބި ބޮޑު ގެއްލުމެއް ލބިގެންދާނެކަން މާލީ އިދާރާތަކުން ބަޔާންކޮށް ކަންބޮޑުވުން ފާޅުކުރުމާއި ގުޅިގެންނެވެ. 

އެ އިސްލާހު އެގޮތަށް އޮވެއްޖެކަމަށް ވާނަމަ ދައުލަތަށް 600 ބިލިއަން ރުފިޔާ ގެއްލިގެންދާނެކަން މާލީ އިދާރާތަކުން ވަނީ ބަޔާންކޮށްފައެވެ. 

އެހެން ނަމަވެސް މިހާރު އެ ގޮތް ބަދަލުކޮށް އަނެއްކާވެސް އެ ބިލު ވަނީ ތަސްދީގު ކުރައްވާފައެވެ.