ފަތުވާ މަޖިލީހެއް ނުވަތަ ފިގުހު އެކަޑަމީއެއް ވިޔަސް އެތަނެއްގައި ތިބެންވާނީ އެހެން ގައުމުތަކުން ފަތުވާތައް އިމްޕޯޓު ކުރާ މީހުން ނޫން ކަމަށް މަޝްހޫރު ދީނީ އިލްމުވެރިޔާ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

ޑރ.ޝަހީމް މިހެން ވިދާޅުވީ، ދީނީ ލަފާ ފޯރުކޮށްދިނުމަށް އުފައްދާފައިވާ "އިސްލާމީ ފަތުވާ ދޭ އެންމެ މަތީ މަޖިލިސް" ހުސްކަމެއްގައި ގިނަ އަހަރުތަކެއް ވެފައިވާތީ އެ މަޖިލީސް އެކުލަވާލަން އިއްޔެ ރައްޔިތުންގެ މަޖިލީހަށް ހުށަހަޅާފައިވާ ގަރާރާ ގުޅިގެން މިއަދު ކުރެއްވި ޓުވީޓެއްގައެވެ.

ފަތުވާ މަޖިލީހަށް މެމްބަރުން އައްޔަނު ކުރުން އަވަސް ކުރަން ގޮވާލައި މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވީ، ބަވަނަވެފައިވާ ދުނިޔޭގައި، ގުޅިލާމެހިފައިވާ ގޮތެއްގައި ދިރިއުޅެން ޖެހިފައިވާ ދިވެހިންނަށް އެކިގޮތްގޮތުން ފޯރަމުންދާ ނުފޫޒުތަކުގެ ސަބަބުން ދީނީ ހިލާފުތަކާއި ހަރުކަށި ފިކުރު އިތުރު ވެފައިވާ ކަމަށެވެ.

Advertisement

އެގަރާރާއި ގުޅުވައި ޝަހީމް ކުރެއްވި ޓުވީޓުގައި ވިދާޅުވީ، ފަތުވާ ކައުންސިލްގައި ނުވަތަ ފިގުހު އެކަޑަމީގައި ވިޔަސް، އެތަންތަނުގައި ތިބެންވާނީ އެހެން ގައުމުތަކުން ފަތުވާ އިމްޕޯޓު ނުކުރާ، އަމިއްލަ ރަޢުޔާ ތައައްސަބުނުވާ އިލްމީ ބަހުސްކޮށް، އަދި ވަގުތާއި ހާލަތަށް ފިގުހު ފައްތަން ދަންނަ ފިގުހުވެރިން ކަމަށެވެ.