ރައްޔިތުންގެ މަޖިލީހުގައި އިއްޔެ ބޭއްވި ސިއްރު ކޮމެޓީއެއްގައި ދެއްކި ވާހަކަތަކެއް އޮޅުމަކުން ލައިވްކޮށްފައި އޮއްވައި އޭގެ ހަބަރުތައް ނޫހުން ނަގަން އެންގުމަކީ މަޖިލީހަށް ކުރެވިގެން ވާނެ ކަމެއް ނޫން ކަމަށް މޯލްޑިވްސް ޖާނަލިޒަމް އެސޯސިއޭޝަން (އެމްޖޭއޭ) އިން މިއަދު ބުނެފި އެވެ.

 ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމެޓީގެ އިއްޔެގެ ބައްދަލުވުމަށް ހޯމް މިނިސްޓަރު އިމްރާން ހާޒިރުކޮށް، ކޮމެޓީ ވަނީ ސިއްރުކޮށްފައެވެ. އެހެން ނަމަވެސް ދިމާވި ޓެކްނިކަލް މައްސަލަ އަކާ ގުޅިގެން ވަނީ ލައިވް ކުރެވިފައެވެ. ލައިވް ފީޑް ގަޑިއެއްހާއިރަށް ދެމިގެންދިޔައިރު އެ ކޮމެޓީގައި ދެކުވުނު ވާހަކަތަކަށް ބިނާކޮށް، ބައެއް ނޫސްވެރިން ވަނީ ހަބަރު ގެނެސްދީފައެވެ.

މިމައްސަލައާއި ގުޅިގެން މޯލްޑިވްސް ޖާނަލިސްޓް އެސޯސިއޭޝަނުން ނެރުނު ބަޔާނުގައި ބުނެފައިވަނީ މަޖިލީހުގެ އިދާރާއަށް ހެދުނު ގޯހެއްގެ ސަބަބުން އާންމުވި، އޯޑިއޯއެއްގެ މައްޗަށް ހަބަރު ލިޔެގެން އެ ހަބަރުތައް ނެގުމަށް މަޖިލީހުން އެންގުމަކީ އެ ޖަމިއްޔާއިން ކަންބޮޑުވާ ކަމެއް ކަމަށެވެ. އަދި، ގިނައިރު ތަކެއް ވަންދެން ކޮމެޓީ ލައިވްކުރި ކަމަށާއި ހަބަރުތައް ލިޔުމުގެ ކުރިން އެކަން އެގޮތަށް ނުކުރުމަށް އަންގާފައިނުވާ ކަމަށް ބަޔާނުގައިވެއެވެ.

Advertisement

އަދި ރައްޔިތުންގެ މަޖިލީހުގެ ގަވައިދަށް ބެލުމުން އެނގޭ ގޮތުގައި ސިއްރު ކޮމެޓީތަކުގެ ސިއްރުކަން ހިފެހެއްޓުމާއި މައުލޫމާތު ހާމަނުކުރުމަކީ މަޖިލީހުގެ ޒިންމާއެކެވެ. އެހެން ކަން އޮތް އިރު، ނޫސްތަކުގައި ޖެހި އެ ހަބަރު ނެގުމަށް މަޖިލީހުގެ އިދާރާ އަށް ސީދާ ނޫސްތަކަށް އެންގިދާނެ ކަމަށް ޖަމިއްޔާއިން ގަބޫލުނުކުރާ ކަމަށްވެސް ބަޔާނުގައި ބުނެފައިވެއެވެ.