ބަންގްލަދޭޝްގެ އަލަމްގިރްއާ އެކުގައި އެއް ޖިންސުން ގުޅުން ހިންގި ކަމަށް އިއުތުރާފްވެފައިވާ ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތް ކުރި އަބްދުއްރަހްމާން ރަފީއު (ދޮންދިގު) އެއް އަހަރާއި ދެ މަހަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ. 

ބަންގްލަދޭޝްގެ ޒުވާނެއްކަމަށްވާ އެމްޑީ އަލަމްގީރް (އަލަމްގިރި) އާއެކު އެއް ޖިންސުން ޖިންސީ ގުޅުން ހިންގި ކަމަށް ތުހުމަތުކުރެވޭ މައްސަލައިގައި އަބްދުއްރަޙްމާން ހައްޔަރު ކުރީ، ޖުލައި 28 ވަނަ ދުވަހު އެވެ. އެއަށްފަހު އޭނާ ބަންދުގައި ބެހެއްޓުމަށްފަހު، ބަންދުން ދޫކޮށްލީ އޭނާގެ މައްޗަށް ދައުވާ ކުރަން ކޯޓަށް ފޮނުވުމަށް ފަހުގައެވެ. 

އެ މައްސަލާގައި އޭނާގެ މައްޗަށް ކޮށްފައިވާ، އެއްޖިންސުން ޖިންސީ ގުޅުން ހިންގުމުގެ ދައުވާގެ އަޑުއެހުމެއް މިމަހު 18 ވަނަ ދުވަހުވެސް ވަނީ ބާއްވާފައެވެ. އެ އަޑުއެހުމުގައި އަބްދުއްރަހްމާން ވަނީ އެއް ޖިންސުން ގުޅުންހިންގި ކަމަށް ޝަރީއަތުގައި އިއުތިރާފުވެފަ އެވެ. އޭނާ ކުށަށް އިއުތުރާފުވުމުން މައްސަލަ ބެއްލެވި ގާޒީ ނިންމެވީ މިއަދު އަވަސް ނިޔާގައި އެ މައްސަލާގައި ހުކުމްކުރުމަށެވެ.

އެގޮތުން މިއަދު ކްރިމިނަލް ކޯޓުން ކުރި ހުކުމުގައި ވަނީ، އަބްދުއްރަޙްމާނު ރަފީޢުގެ މައްޗަށް ދައުލަތުން ދަޢުވާކުރި އެއްޖިންސުން ޖިންސީގުޅުން ހިންގުމުގެ ކުށުގެ ދަޢުވާ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 51 ވަނަ މާއްދާގެ (އ) ގައި ބަޔާންކުރާ އެކަށީގެންވާ ޝައްކެއްނެތް މިންވަރަށް ޝަރީޢަތަށް ސާބިތުވާކަމަށެވެ. 

ވުމާއެކު، ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 1002 ވަނަ މާއްދާގެ (ހ) ގެ ދަށުން ޢަބްދުއްރަޙްމާނު ރަފީޢު 01 (އެކެއް) އަހަރާއި 02 (ދޭއް) މަހާއި 12 (ބާރަ) ދުވަހުގެ މުއްދަތަށް ޖަލަށްލުމަށް ކޯޓުން ވަނީ ޙުކުމްކޮށްފައެވެ.

އަދި ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 186 ވަނަ މާއްދާއަށް ރިޢާޔަތްކޮށް، ޢަބްދުއްރަޙްމާނު ރަފީޢު ތަންފީޒުކުރަންޖެހޭ މުއްދަތަކީ، 01 (އެކެއް) އަހަރާއި 01 (އެކެއް) މަހާއި 28 (އަށާވީސް) ދުވަސް ކަމަށްވެސް އެ ހުކުމުގައި ވެއެވެ. 

ޢަބްދުއްރަޙްމާނު އަށް ކޯޓުން މިފަދަ ހުކުމެއް ކޮށްފައިވާއިރު، އޭނާ އަށް ހުކުމް ކުރުމުގެ ކުރިން އޭނާ ވަނީ ކުށަށް އިއުތިރާފްވެ އާއްމުންގެ ކިބައިން މާފަށް އެދިފައެވެ.

 އަލަމްގިރް އާއިއެކު އެއްޖިންސުން ގުޅުން ހިންގި  މައްސަލައިގައި އިއުތިރާފުވެ މާފަށް އެދުމުން، މަޖިލީހުގެ ރައީސް މުހައްމަދު ނަޝީދުގެ ކޮއްކޮ ނާޒިމް ސައްތާރުގެ އަދަބު ކްރިމިނަލް ކޯޓުން ވަނީ ލުއިކޮށްދީފައެވެ. އެގޮތުން އޭނާ ކުށަށް އިއުތިރާފް ވެ މާފަށް އެދުމާއި ގުޅިގެން އޭނާގެ މައްޗަށް ކްރިމިނަލް ކޯޓުން މިދިޔަ ބުރާސްފަތި ދުވަހު ހުކުމްކުރީ ތިން މަހާއި 26 ދުވަހު ގޭ ބަންދު ކުރުމަށެވެ.