އެއްޖިންސުން ގުޅުން ހިންގުމާއި އެކަމަށް ތާއީދު ކުރާ ޖަމާއަތްތަކާއި ދެކޮޅަށް ތުރުކިޔޭގައި ވަރުގަދަ މުޒާހަރާއެެއް ބާއްވައިފިއެވެ.

މި މަހުގެ 19 ވަނަ ދުވަހު ބޭއްވުނު މި މުޒާހަރާގައި ތުރުކިޔޭގެ މުސްލިމް އާބާދީގެ ގިނަ ބަޔަކު ބައިވެރިވި މި މުޒާހަރާގައި އެތައް ހާސް ބަޔަކު ފެނިގެން ގޮސްފައިވެއެވެ. މުޒާހަރާގެ ބައިވެރިން ދިޔައީ އެ ގައުމުގައި އެއްޖިންސުން ގުޅުން ހިންގުމުގެ އަމަލުތައް އާންމުވުން ހުއްޓުވައި އެކަމަށް އެއްބާރުލުންދޭ ޖަމާއަތްތައް އުވާލުމަށް ގޮވާލާފައެވެ. 

މުޒާހަރާގެ އޮފިޝަލަކު މީޑިއާތަކަށް މައުލޫމާތު ދެމުން ބުނެފައިވަނީ މިހާތަނަށް އެ ގައުމުގައި އެއްޖިންސުން ގުޅުން ހިންގުމާއި ދެކޮޅަށް ހަރުކަށި ފިޔަވަޅުތަކެއް އެޅުމަށް މިހާތަނަށް 150،000 މީހުންގެ ސޮއެ ލިބިފައިވާ ކަމަށެވެ. 

ތުރުކިޔޭގައި 1858 ވަނަ އަހަރުން ފެށިގެން އެއްޖިންސުން ގުޅުން ހިންގުމަކީ ގާނޫނީ ކުށެއް ނޫނެވެ. ނަމަވެސް އެ ގައުމުގެ މުސްލިމް އާބާދީގެ ގިނަ ބަޔަކު އަންނަނީ އެއީ ގާނޫނީ ކުށަކަށް ހަދާ އެ ގައުމުގައި އެކަން ހުއްޓުވުމަށް ސަރުކާރަށް ގޮވާލާ ތަކުރާރުކޮށް ނުރުހުން ފާޅުކޮށްފައެވެ. 

އިންސާނީ ހައްގުތަކަށް މަސައްކަތްކުރާ ބައިނަލްއަގްވާމީ ޖަމާއަތްތަކާއި އެއްޖިންސުން ގުޅުން ހިންގުމާއި އެއްކޮޅަށް މަސައްކަތް ކުރާ ގިނަ ޖަމާއަތްތަކުން ވަނީ މި މުޒާހަރާ ކުއްވެރިކޮށްފައެވެ.