އިނގިރޭސި ޓީމުތައް ކަމަށްވާ މެންޗެސްޓާ ޔުނައިޓެޑު އަދި ޗެލްސީ އަށް ނޫނެކޭ ބުނެ ފްރެންކީ ޑިޔޯން ސްޕެއިންގެ ބާސެލޯނާަގައި މަޑުކުރަން ނިންމައިފި އެވެ.

މި އަހަރުގެ ހޫނު މޫސުމުގެ ޓްރާންސްފާ ވިންޑޯގައި އެންމެ ގިނަ ބައެއްގެ ސަމާލުކަން ލިބިގެން ގޮސްފައިވާ އެއް ކުޅުންތެރިއަކީ ޑިޔޯން އެވެ. ޖޫން މަހުގެ ފަހުކޮޅު ޑިޔޯން ޔުނައިޓެޑާއި ގުޅޭނެ ކަމަށް ގިނަ ރިޕޯޓު ތަކަކުން ބުނެފައިވެއެވެ. މީގެ އިތުރުން ޔުނައިޓެޑުން ވަނީ ޖުލައި މަހުގެ 14 ވަނަ ދުވަހު ޑިޔޯން ގެ ޓްރާންސްފާއަށް ބާސާ އާއި އެކު އެއްބަސް ވުމަކަށްވެސް އަތުވެފައެވެ، ނަމަވެސް ޑިޔޯން އަދި އޭނާގެ އެޖެންޓުންނާއި އެކު އެއްބަސް ވުމަކަށް ނާދެވުމާއި ގުޅިގެން ޔުނައިޓެޑުން ވަނީ ފަހުން ޑިޔޯން ގެނައުމުގެ މަސައްކަތް ހުއްޓާލާފައެވެ.

އޭގެ ފަހުން ޗެލްސީއިން ވަނީ ޑިޔޯން ގެނައުމަށް މަސައްކަތް ފަށާފައެވެ. ނަމަވެސް ބާސެލޯނާއިން އެ ޓީމުގެ ބިޑު ތަކަށް ޝައުގުވެރިކަން ފާޅު ކުރިޔަސް ޑިޔޯން ވަނީ ތަކުރާރުކޮށް ބާސާގައި މަޑުކުރަން ބޭނުންވާ ކަމަށް ބުނެފައެވެ. މިއާއި އެކު ޗެލްސީއިން ވެސް ފަހުން ވަނީ ޑިޔޯން ގެނައުމަށް މާބޮޑު މަސައްކަތްތަކެއް ނުކުރުމަށް ނިންމާފައެވެ.

Advertisement

ޑިޔޯން ބާސާގައި މަޑުކުރަން ބޭނުންވި ނުވަތަ އެ ޓީމު ދޫކޮށްލުމަށް ބޭނުންނުވި އެންމެ ބޮޑު އެއް ސަބަބަކީ އެ ޓީމުން މުސާރާއިގެ ގޮތުގައި ޑިޔޯން އަށް ނުދީ 17 މިލިއަން ޔޫރޯ އޮތް އޮތުން ކަމުގައި ގިނަ ރިޕޯޓުތަކުން ބުނެއެވެ. ސަބަބަކީ މި ސީޒަނަށް ގިނަ ކުޅުންތެރިން ތަކެއް ގަނެ ބާސެލޯނާގެ ސްކޮޑު ވަރުގަދަ ކުރުމާއި އެކު ޑިޔޯން އަށް ވަނީ ފުރަތަމަ 11 އިން ޖާގަ ގެއްލިފައެވެ. އަދި މި ސީޒަނުގެ ކުރިއަށް ހުރި މެޗު ތަކުގައިވެސް ޑިޔޯން ފުރަތަމަ 11 އިން ފެންނާނެ ކަމަކަށް ނުބެލެވެއެވެ.