މިވަގުތު ސައުދީ އަރަބިއާގައި ތިބި 20 އަހަރުން ދަށުގެ ގައުމީ ފުޓްބޯޅަ ޓީމުން އުމްރާގެ އަޅުކަން އަދާކޮށްފިއެވެ.

އުމްރާގެ އަޅުކަމުގައި ޓީމުގެ ހުރިހާ ކުޅުންތެރިންނާއި އޮފިޝަލުން ވަނީ ބައިވެރިވެފައެވެ. 20 އަހަރުން ދަށުގެ ގައުމީ ޓީމު އޮގަސްޓް 31 ވަނަ ދުވަހު ސައުދީއަށް ފުރާފައިވަނީ މި މަހުގެ 10-18 އަށް އެ ގައުމުގައި ބޭއްވުމަށް ހަމަޖެހިފައިވާ 20 އަހަރުން ދަށުގެ އޭޝިއަން ކަޕް ކޮލިފިކޭޝަން ބުރުގެ މެޗުތަށް ކުޅުމަށެވެ.

ޒުވާން ގައުމީ ޓީމުގެ ކޯޗު އަހުމަދު ޝާކިރު (ޝާކިއްޓޭ) ފޭސްބުކްގައި ކޮށްފައިވާ ޕޯސްޓެއްގައި ބުނެފައިވަނީ ޓީމުގެ ކުޅުންތެރިންނާއި އޮފިޝަލުންނަށް މި ފުރުސަތު ފަހިވެގެން ދިޔަ ކަމަށްޓަކައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަދި ސައުދީގެ ފުޓްބޯޅަ އެސޯސިއޭޝަން އަށް ޝުކުރު އަދާކުރާ ކަމަށެވެ.

މީގެ އިތުރުން މި މަހުގެ 10 ގައި ފެށުމަށް ހަމަޖެހިފައިވާ ކޮލިފިކޭޝަން މެޗު ތަކުގެ ކުރިން އެ ގައުމުގައި ޓްރެއިނިންގެ ކޭމްޕެއް ކުރުމަށް ނިންމާފައިވާ ކަަމަށްވެސް ޝާކިއްޓޭ ވަނީ ބުނެފައެވެ.

ކޮލިފިކޭޝަން ބުރުގައި ރާއްޖޭގެ ޒުވާން ޓީމު ކުޅޭނީ ސައުދީ، ޗައިނާ، މިޔަންމާ، އަދި އުޒްބެކިސްތާނާއި ދެކޮޅަށެވެ.