މިދިޔަ ސީޒަނުގެ ސްޕެއިންގެ ޗެމްޕިއަން ރެއާލް މެޑްރިޑުން ދެވަނައިގައި އޮތް ރެއަލް ބެޓިސް ބަލިކޮށް އެއްވަނައިގައި ހަމަޖެހިލައިފިއެވެ.

މިއާއި އެކު ރެއާލުން ވަނީ ބެޓިސްގެ މޮޅުވުމުގެ ސިލްސިލާ ނިންމުމަކަށް ގެނެސްފައެވެ. މިހާތަނަށް ލަލީގާގައި ކުޅުނު ހުރިހާ މެޗެއް ކާމިޔާބުކުރި ހަމައެކަނި ސްޕެއިންގެ ޓީމުގެ ގޮތުގައި މިހާރު އޮތީ ރެއާލް މެޑްރިޑެވެ.

ރެއާލްގެ ދަނޑުގައި ކުޅުނު މި މެޗުގައި އެންމެ ފުރަތަމަ ގޯލު ޖަހާ ލީޑު ނެގީވެސް ރެއާލުންނެވެ. މެޗުގެ 9 ވަނަ މިނަޓުގައި އެ ޓީމަށް މި ގޯލު ޖަހައިދިނީ ބްރެޒިލްގެ ޒުވާން ތަރި ވިނިސަސް ޖޫނިއާ އެވެ. ނަމަވެސް މެޗުގެ 17 ވަނަ މިނަޓުގައި ބެޓިސްގެ ސާޖިއޯ ކަނަލެސް ވަނީ ގޯލެއް ޖަހާ މެޗުގެ ނަތީޖާ އެއްވަރު ކޮށްފައެވެ.

މެޗުން ރެއާލް މޮޅުކޮށްދިން ގޯލު މެޗުގެ ދެވަނަ ހާފުގައި ޖަހައިދިނީ އެ ޓީމުގެ ރޮޑްރިގޯއެވެ. މި މޮޅާއި އެކު ކުޅުނު 4 މެޗުން 12 ޕޮއިންޓް ހޯދާ އެ ޓީމު ވަނީ އެއް ވަނައިގައި ހަމަޖެހިލާފައެވެ.

މެޗަށްފަހުު ރެއާލްގެ ކޯޗު ކާލޯ އެންޖެލޯޓީ ބުނެފައިވަނީ ކޮންމެ ތިން ދުވަހަކުން މެޗެއް ކުޅެން ޖެހުމާއި އެކު ޓީމުގެ ފުރަތަމަ 11 އަށް ބަދަލުތަކެއް އަންނާނެ ކަަމަށެވެ. އަދި މެޗާއި މެދު ހިތްހަމަ ޖެހުނަސް ބެޓިސްއިން ޖަހާފައިވަނީ މާބޮޑަށް ފަސޭހަ ގޯލެއް ކަމަށް އެންޖެލޯޓީ ވަނީ ބުނެފައެވެ.

ލަލީގާ އަދި ޗެމްޕިއަންސް ލީގުގެ އެންމެ ފަހުގެ ޗެމްޕިއަނުން ކަމަށްވާ ރެއާލުން ދެން ލީގުގައި މަލޯކާ އާއި ދެކޮޅަށް ކުޅުމުގެ ކުރިން ޗެމްޕިއަންސް ލީގުގައި ސެލްޓިކާއި ދެކޮޅަށް ކުޅޭނެއެވެ.