ލިވަޕޫލުން ޕްރިމިއާ ލީގުގައި އެންމެ ވާދަވެރި އެވަޓަން އާއި ދެކޮޅަށް ކުޅުނު މެޗުވެސް އެއްވަރުވެ އެ ޓީމުގެ އައު ސީޒަން ގޯހުން ގޯހަށް ދާން ފަށައިފިއެވެ.

މިއީ ލިވަޕޫލުން މި ސީޒަނުގައި ކުޅުނު 6 ވަނަ މެޗު ކަމަށް ވާއިރު މިދިޔ ސީޒަނުގައި ދެވަނައިގައި ނިންމި ލިވަޕޫލަށް މި 6 މެޗުގެ ތެރެއިން ކާމިޔާބު ކުރެވުނީ އެންމެ ދެ މެޗެވެ. މީގެއިތުރުން ވާދަވެރި މެންޗެސްޓާ ޔުނައިޓެޑު އަތުން ބަލިވެ އިތުރު ތިން މެޗުން ވަނީ އެއްވަރުވެފައެވެ.

ފާހަގަ ކޮށްލެވޭ ގޮތުގައި މިދިޔަ ސީޒަނުގައި ލިވަޕޫލަށް އެންމެ ރަނގަޅަށް ކުޅުނު މުހައްމަދު ސަލާހް އަށް މި ސީޒަނުގެ މިހާތަނަށް އޭނާގެ އަސްލު ކުޅުން ދައްކާލެވިފައެއް ނުވެއެވެ.

މެޗަށްފަހު ވާހަކަ ދައްކަމުން ލިވަޕޫލުގެ ކޯޗު ޔާގަން ކްލޮޕް ބުނެފައިވަނި ގާތް ގާތުގައި މެޗުތައް ކުޅެން ޖެހުމުގެ އަސަރު އޭނާގެ ޓީމަށް ކޮށްފައިވާ ކަަމަށެވެ. އެގޮތުން ދެ މެޗު ދޭތެރޭގައި ރަނގަޅަށް ތިން ޓްރެއިނިން ސެޝަންވެސް ނުބޭއްވޭ ކަަމަށް ކޮލޮޕް ވަނީ ބުނެފައެވެ.

މި އަހަރުގެ ވޯލްޑް ކަޕް ފިނި މޫސުމުގައި ކުޅުމަށް ނިންމާފައިވުމުން ގިނަ ލީގު މެޗުތަކެއް ކައިރި ކައިރީގައި ކުޅެން ޖެހިފައިވާއިރު، އަންނަ ހަފްތާ ޔޫއެފާ ޗެމްޕިއަންސް ލީގު އަދި ޔޫރަޕާ ލީގުގެ މެޗުތައްވެސް ފެށިގެންދާނެއެވެ.

އެވަޓަންގެ ދަނޑުގައި ކުޅެވުނު މެޗުން ދެ ޓީމު 0-0 އިން އެއްވަރުވި އިރު މެޗުގައި ދެ ޓީމަށްވެސް ވަނީ ގޯލު ޖަހާނެ ގިނަ ފުރުސަތު ތަކެއް ލިބިގެން ގޮސްފައެވެ. ނަމަވެސް އެއްވެސް ޓީމަކަށް އެންމެ ރަނގަޅަށް އެ ފުރުސަތު ތަކުގެ ބޭނުން ހިފިފައެއް ނުވެއެވެ. މެޗުގައި އެންމެ މޮޅު ކުޅުމެއް ފެނިގެން ގޮސްފައިވަނީ އެވަޓަންގެ ކީޕަރު ޖޯޑަން ޕިކްފޯޑުގެ ފަރާތުންނެވެ.

ލިވަޕޫލުން ދެން ލީގުގައި ނިކުންނާނީ ވުލްވްސްއާއި ދެކޮޅަށެވެ. ނަމަވެސް އޭގެ ކުރިން ޔޫއެފާ ޗެމްޕިއަންސް ލީގުގައި އެ ޓީމުން ނަޕޯލީއާއި ދެކޮޅަށް ނުކުންނާނެއެވެ.