ޕްރިމިއާ ލީގުގައި މެންޗެސްޓާ ޔުނައިޓެޑުން ވާދަވެރި އާސެނަލް ބަލިކޮށް އެ ޓީމުން މި ސީޒަނުގައި ދަމަހައްޓަމުން ގެންދިޔަ މޮޅުވުމުގެ ސިލްސިލާ ނިމުމަކަށް ގެނެސްފިއެވެ.

ޔުނައިޓެޑުގެ ދަނޑުގައި ކުޅުނު މި މެޗަށް އާސެނަލް ނިކުތީ މިހާތަނަށް އެ ޓީމުން ލީގުގައި ކުޅުނު ފުރަތަމަ 5 މެޗު ކާމިޔާބު ކުރުމަށްފަހުއެވެ. ނަމަވެސް ޔުނައިޓެޑުން ވަނީ މި މެޗުގައި 1-3 ގެ ނަތީޖާއަކުން އާސެނަލް ބަލިކޮށްފައެވެ. މިއާއި އެކު ޔުނައިޓެޑުން ވަނީ ލީގުގައި އެންމެ ފަހުން ކުޅުނު ހަތަރު މެޗު ކާމިޔާބު ކޮށްފައެވެ.

މެޗަށްފަހު ވާހަކަ ދައްކަމުން ޔުނައިޓެޑުގެ ކޯޗު އެރިކް ޓެންހާގް ބުނެފައިވަނީ ވަރުގަދަ ޓީމަކާއި ދެކޮޅަށް ކުޅެ އޭނާގެ ޓީމުން ހޯދި ކާމިޔާބީއާއި މެދު ހިތްހަމަ ޖެހޭ ކަމަށެވެ. އަދި މީގެ އިތުރަށްވެސް ރަނގަޅު ކުރަންޖެހޭ ބައިވަރު ކަންކަން އެބަހުރި ކަމަށާއި މި މެޗު ކާމިޔާބު ކުރެވުނީ ކުޅުންތެރިން ދެއްކި ހިތްވަރުން ކަމުގައި ޓެންހާގް ވަނީ ބުނެފައެވެ.

Advertisement

މެޗުން ބަލިވި އާސެނަލްގެ ކޯޗު މިކެލް އާޓެޓާ ވަނީ މެޗަށްފަހު އޭނާގެ ޓީމުން ފުރަތަމަ ޖެހި ގޯލު ރެފްރީ ގަބޫލު ނުކުރުމުން އެކަމާއި ހިތްހަމަނުޖެހުން ފާޅުކޮށްފައެވެ.

މެޗު ފަށައިގެން ރަނގަޅަށް ކުޅެމުންދިޔައީ ޔުނައިޓެޑުންނެވެ. މެޗުގެ 15 ވަނަ މިނަޓުގައި އާސެނަލްގެ މާޓިނެލީ ވަނީ ކައުންޓާ އެޓޭކުގައި ގޯލެއް ޖެހި ނަމަވެސް މެޗުގެ ރެފްރީ ވަނީ އާސެނަލްގެ ގޯލު ޖެހުމަށް ބޯޅަ ހޯދުމުގެ ތެރޭގައި އެ ޓީމުގެ ކެޕްޓަން އޮޑެގާޑް ފައުލް ކޮށްފައިވާ ކަމަށް ނިންމާފައެވެ.

މެޗުގެ ފުރަތަމަ ގޯލު ޖަހާ ޔުނައިޓެޑުން ލީޑު ނެގީ 35 ވަނަ މިނަޓުގައެވެ. މި ގޯލު އެ ޓީމަށް ކާމިޔާބު ކޮށްދިނީ ނިމިދިޔަ ހަފްތާ 100 މިލިއަން ޔޫރޯގެ އަގަކަށް އެ ޓީމާއި ގުޅުނު އެންޓޮނީ އެވެ. މިއީ އެންޓޮނީ ޔުނައިޓެޑުގެ ޖާޒީގައި ފެނިގެންދިޔަ ފުރަތަމަ މެޗެވެ. މި ގޯލާއި އެކު އާސެނަލް ކުޅުން ރަނގަޅުކުރި ނަމަވެސް ޔުނައިޓެޑުން ވަނީ ރަނގަޅަށް ޑިފެންޑުކޮށް ލީޑުގައި އޮވެ ހާފު ނިންމާލާފައެވެ.

ނަމަވެސް ދެވަނަ ހާފު ފަށައިގެން މެޗު ކޮންޓްރޯލް ކުރަމުންދިޔައީ އާސެނަލް އިންނެވެ. އެ ގޮތުން މެޗުގެ 60 ވަނަ މިނަޓުގައި އާސެނަލްއަށް ނަތީޖާ ހަމަހަމަ ކޮށްދިނީ ބުކަޔޯ ސަކާއެވެ. އާސެނަލްގެ ލީޑަށް 6 މިނަޓު ނުވަނީސް ޔުނައިޓެޑުގް މާކަސް ރަޝްފޯޑު ވަނީ އެ ޓީމަށް އަނެއްކާ ލީޑު ނަގައިދީފައެވެ. މެޗުގެ 75 ވަނަ މިނަޓުގައި ޔުނައިޓެޑުގެ ތިންވަނަ ގޯލު ޖަހައިދިނީވެސް ރަޝްފޯޑެވެ.

ޔުނައިޓެޑުން އަންނަ ލީގުގައި އަންނަ އާދިއްތަ ދުވަހު ކްރިސްޓަލް ޕެލެސްއާއި ކުޅުމުގެ ކުރިން ޔޫރަޕާ ލީގުގައި ސްޕެއިންގެ ރެއާލް ސޮސިޑޭޑާއި ދެކޮޅަށް ކުޅޭނެއެވެ.

އާސެނަލްއިންވެސް ޔޫރަޕާ ލީގުގައި އެފްސީ ޒުރިކް އާއި ދެކޮޅަށް ކުޅުމަށްފަހު ލީގުގައި ދެން ނިކުންނާނީ ރަނގަޅު ފޯމެއްގައި އޮތް އެވަޓަންއާއި ދެކޮޅަށެވެ.