ޕްރިމިއާ ލީގުގެ އެންމެ ފަހުގެ ޗެމްޕިއަން މެންޗެސްޓާ ސިޓީ އެސްޓަން ވިލާ އާއި އެއްވަރުވެ އެއްވަނަ އަށް އެރުމަށް ލިބުނު ފުރުސަތު ގެއްލިއްޖެއެވެ.

ރޭގެ މެޗުން ސިޓީ މޮޅުވި ނަމަ އެއްވަނައިގައި އޮތް އާސެނަލްގެ މައްޗަށް ސިޓީއަށް އެއް ޕޮޮއިންޓުގެ ލީޑެއް ލިބުނީހެވެ. މިހާތަނަށް ކުޅުނު ހުރިހާ މެޗު ކާމިޔާބުކޮށް އެއްވަނައިގައި އޮތް އާސެނަލް އިން މިރޭ ނިކުންނާނީ ވާދަވެރި މެންޗެސްޓާ ޔުނައިޓެޑާއި ދެކޮޅަށެވެ. އެންމެ ފަހުން ލީގުގެ ހަވަނަ މެޗުގައި އާސެނަލްއިން ޔުނައިޓެޑުގެ މައްޗަށް ކުރިހޯދި ސީޒަނުގައި އެ ޓީމުން ވަނީ މެޗަކުން ބަލިނުވެ ލީގު ކާމިޔާބުކޮށްފައެވެ.

މެޗަށްފަހު ވާހަކަ ދައްކަމުން ސިޓީގެ ކޯޗު ޕެޕް ގާޑިއޯލާ ބުނެފައިވަނީ ރޭގެ މެޗުގައި އޭނާގެ ޓީމުން ދެއްކީ ރަނގަޅު ކުޅުމެއް ކަމަށާއި ޕްރިމިއާ ލީގުގެ ހުރިހާ މެޗުތަކަކީވެސް އުނދަގޫ މެޗުތަކެއް ކަމަށެވެ. އަދި ކައިރި ކައިރީގައި މެޗުތައް ކުޅެން ޖެހުމުގެ އަސަރު ކުޅުންތެރިންނަށް ކުރާކަމަށް ޕެޕް ވަނީ ބުނެފައެވެ.

Advertisement

ވިލާގެ ދަނޑުގައި ކުޅުނު މި މެޗުގެ ފުރަތަމަ ހާފު ގޯލެއް ނުޖެހި ނިމިގެން ދިޔަ ނަމަވެސް، ދެވަނަހާފުގައި ސިޓީގެ އާލިން ހާލަންޑު ވަނީ އެ ޓީމަށް ލީޑު ނަގައިދީފައެވެ. މިއީ އޭނާ ލީގުގައި ކުޅުނު 6 މެޗުގައި ޖެހި 10 ވަނަ ގޯލެވެ. އެއަށްފަހު ކައުންޓާ އެޓޭކުގައި ވިލާއަށް ނަތީޖާ ހަމަހަމަ ކޮށްދިނީ ލިއޮން ބެއިލީއެވެ. އެއަށްފަހު ވިލާގެ ކޯޓީނޯ ގޯލެއް ކާމިޔާބު ކުރި ނަމަވެސް ރެފްރީ ވަނީ އެއީ އޮފްސައިޑް ގޯލެއް ކަމަށް ނިންމާފައެވެ. މެޗު ނިމިގެން ގޮސްފައިވަނީ 1-1 ގެ ނަތީޖާއަކުންނެވެ.

ސިޓީއިން ދެން ލީގުގައި ނިކުންނާނީ ތިންވަނައިގައި އޮތް ޓޮޓެންހަމްއާއި ދެކޮޅަށެވެ.