ޝަވިޔަނި އަތޮޅު މިލަންދޫގައި ހުންނަ އެ އަތޮޅު ސްކޫލުގެ ސީލިންގް ވެއްޓުނު ކަމަށްބުނެ ޔޫތު މިނިސްޓަރ ކުރެއްވި ޓުވީޓަކީ އިތުރުފުޅެއްކަން ހާމަވެއްޖެއެވެ.

މަހްލޫފު ކުރެއްވި ޓުވީޓުގައި އެ ސްކޫލުގެ ސީލިންގު ވެއްޓުނު ކަމަށްބުނެ ލިޔެފައިވާ ހަބަރެއް ހިއްސާ ކުރުމަށްފަހު ވިދާޅުވެފައިވަނީ ހިޔާ ފުލެޓް ސަރަހައްދަށް އެއްވެސް ޕްލޭނެއްނެތި ތޮއްޖައްސާލި ދަރިވަރުންނަށް ވަގުތީގޮތުން ސްކޫލެއް އަޅާ ދަރިވަރުންނާއި ބެލެނިވެރިން އުފުލި ތަކުލީފު ނިމުމަކަށް ގެނެސްފައިވާ ކަމަށެވެ.

މަހްލޫފު މިހެން ވިދާޅުވެފައިވަނީ ހުޅުމާލެ ދެވަނަ ފިޔަވަހީގައި މި ސަރުކާރުން އިމާރާތްކުރި ވަގުތީ ސްކޫލު ހުޅުވުމާއި އެކު ބޭރުން އެ ސްކޫލު ފެންނަގޮތާއި މެދު ގިނަ ބައެއްގެ ފާޑުކިޔުން އަމާޒުވެ، އިދިކޮޅު ފަރާތްތަކުން ކުރީގެ ރައީސް ޔާމީންގެ ސަރުކާރުގައި އަޅާފައިވާ ސްކޫލްތަކާއި އަޅާކިޔާފައިވަނިކޮށެވެ.

Advertisement

ރައްދުގައި ރައީސް ޔާމީން އެޅުއްވި ށ. އަތޮޅު ސްކޫލަށް އިޝާރަތް ކުރައްވާ މަހްލޫފް ވިދާޅުވެފައިވަނީ މާބޮޑު ސްކޫލެއް އެޅިކަމަށްބުނެ ފޮނިކަނޑާއިރު، ހަދާނިމުނުއިރު ސީލިންގ އޮތީ ބޮލަށް ވެއްޓިފަކަން ހަނދާން ނުނެތޭ ކަމަށެވެ.

ނަމަވެސް މަހްލޫފުގެ މި ޓުވީޓަކީ އިތުރުފުޅެއްކަން ހާމަވެފައިވަނީ އެ މައްސަލައިގައި ށ. އަތޮޅު ސްކޫލުގެ މަސައްކަތް ކުރި އެސްޖޭ ކޮންސްޓްރަކްޝަންސްގެ ފަރާތުން ދިން ޖަވާބު ފެންމަތި ވުމުންނެވެ. ސީލިންގް ވެއްޓުނު ކަމަށް 2018 ވަނަ އަހަރު އަޑު ފެތުރުމުން އެ ކުންފުނިން ބުނެފައިވަނީ ސްކޫލުގެ ސީލިންގް ނުވެއްޓޭ ކަމަށެވެ. އަދި ސީލިންގް އެ ފަރާތުން ނައްޓާލައިފައިވަނީ މަސައްކަތެއް ކުރުމުގެ ތެރެއިން ކަމަށް އޭރު އެ ކުންފުނިން ވަނީ މީޑިއާ ތަަކަށް މައުލޫމާތު ދީފައެވެ.