މި މަހުގެ 2 ވަނަ ދުވަހު ހއ. އިހަވަންދޫގައި ހިނގި އަލިފާނުގެ ހާދިސާގައި ހާލުގައި ޖެހުނު އާއިލާއަށް 'އެހީ ޖަމިއްޔާ' އިން އެހީތެރިކަން ފޯރުކޮށްދީފިއެވެ.
ރާއްޖޭގައި އެކި ފަރާތްތަކަށް އެހީ ވަމުންދާ "އެހީ ޖަމްއިއްޔާ" އިން ހާލުގައި ޖެހުނު އާއިލާއަށް އަވަސް އެހީއެއްގެ ގޮތުގައި 1 މަސް ދުވަހުގެ ކާބޯތަކެތީގެ އިތުރުން އަންނައުނު އަދި ރީތިވާ ސާމާނުގެ އިތުރުން ވަކި ބާވަތްތަކުގެ ކާބޯތަކެތީގެ ހަރަދު ކުރުމަށް ފައިސާގެ އެހީވެސް ވަނީ ދީފައެވެ.
އަލިފާނުގެ ހާދިސާގައި ރޯވިގެ އަނދާފައިވާއިރު ތިން ކޮޓަރި ހުންނަ އެގޭގައި މީހުން އުޅެމުންދިޔައީ އެއް ކޮޓަރީގައެވެ. މިހާދިސާގައި އެއްވެސް ފަރާތަކަށް އަނިޔާއެއް ނުލިބުނު ނަމަވެސް ބޭނުން ކުރަމުންދާ ކޮޓަރިވެސް ވަނީ ބޭނުން ނުކުރެވޭ ވަރަށް އަނދާފައެވެ.
އާއިލާއަށް އެހީތެރިކަން ފޯރުކޮށްދިން "އެހީ ޖަމްއިއްޔާ" އިން ބުނެފައިވަނީ ޔޮއެދޭ ފަރާތްތަކުގެ އެހީއާއި އެކު މި އާއިލާއަށް ފޯރުކޮށްދެވިފައިވާ މި އެހީއަކީ މިވަގުތަށް އެންމެ މުހިންމު އެހީކަމުގައި އުންމީދުކުރާ ކަމަށެވެ. އަދި އިހަވަންދޫ ކައުންސިލާއި ގުޅިގެން އާއިލާއާއި ބައްދަލުކޮށް ދިރިއުޅުމުގެ ހާލަތު ރަނގަޅުކޮށްދީ ގެ މަރާމާތު ކުރެވޭނެ ގޮތްތައް ބެލުމަށް ވެސް އެބޭފުޅުންގެ ޓީމުން މަސައްކަތް ކުރަމުންދާ ކަމަށްވެސް އެ ޖަމްއިއްޔާއިން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
