2020 ވަނަ އަހަރު ޗެމްޕިއަންސް ލީގު ކާމިޔާބުކުރި ޗެލްސީއިން ގިނަ އައު ކުޅުންތެރިންނާއި އެކު މި ސީޒަނުގެ ޗެމްޕިއަންސް ލީގުގައި ކުޅުނު ފުރަތަމަ މެޗުން ބަލިވެއްޖެއެވެ.

ކްރޮއޭޝިއާގެ ޑައިނަމޯ ރަޒްބެގާއި ދެކޮޅަށް އެ ޓީމުގެ ދަނޑުގައި ކުޅުނު މި މެޗުން ޗެލްސީ ބަލިވެފައިވަނީ 0-1 ގެ ނަތީޖާއަކުންނެވެ.

ފާހަގަ ކޮށްލެވޭ ގޮތުގައި މި އަހަރުގެ ހޫނު މޫސުމުގައި އައު ކުޅުންތެރިން ގެންދިއުމަށް އެންމެ ބޮޑު ހަރަދެއްކުރި ޓީމަކީ ޗެލްސީއެވެ. އެގޮތުން ޗެލްސީއިން ޖުމްލަ 280 މިލިއަން ޔޫރޯ މި ޓްރާންސްފާ ވިންޑޯގައި ވަނީ ހޭދަ ކޮށްފައެވެ. މި މެޗުގެ ސްކޮޑުގައި އެ ހުރިހާ ކުޅުންތެރިންވެސް ހިމެނިފައިވާކަން ފާހަގަ ކޮށްލެވެއެވެ. އެގޮތުން ޑެޑްލައިން ޑޭގައި ބާސެލޯނާ ދޫކޮށް ޗެލްސީއާއި ގުޅުނު އަބަމަޔާންގް ވެސް މިރޭގެ ފުތަމަ 11 ގައި ފެނިގެން ގޮސްފައިވެއެވެ.

މެޗަށްފަހު ވާހަކަ ދައްކަމުން ޗެލްސީގެ ކޯޗު ތޯމަސް ޓުޝެލް ބުނެފައިވަނީ އޭނާގެ ޓީމު ބަލިވީ ކުޅުންތެރިންގެ ކިބައިން ފެންނަންޖެހޭ ވަރަށް މޮޅުވުމުގެ ރޫހު ނުފެނުމުން ކަމަށެވެ. އަދި މި ހާލަތުގައި މަސައްކަތް ނުކޮށް އެއް ދުވަސް ވެސް ދޫކޮށްނުލާނެ ކަމަށާއި މާދަމާ ވެސް ފަރިތަކުރުންތައް އޮންނާނެ ކަމަށް ޓުޝެލް ވަނީ ބުނެފައެވެ.

ޗެލްސީއިން ވަރުގަދަކޮށް މެޗު ފެށިނަމަވެސް މެޗުގެ 13 ވަނަ މިނަޓުގައި ޑައިނަމޯގެ މިސްލަވް އޮރިސިޗް ވަނީ އެ ޓީމަށް ލީޑު ނަގައިދީފައެވެ. ނަމަވެސް ގޯލާއި އެކުވެސް ޑައިނަމޯއަށް މެޗުގެ ކޮންޓްރޯލް ނެގޭ ގޮތް ވަނީ ނުވެފައެވެ. އެގޮތުން އެ ޓީމުން ޖެހުނީ މެޗުގެ ދެ ހާފުގައިވެސް ޗެލްސީއިން އުފައްދަމުން ގެންދިޔަ ހަމަލާތައް ދިފާއު ކުރާށެވެ.

ޗެލްސީގެ އަބަމަޔާންގް ފުރަތަމަ ހާފުގައި ގޯލެއް ޖެހި ނަމަވެސް އެ ގޯލު ޖެހުމުގެ ތެރޭގައި ޗެލްސީގެ ބެން ޗިލްވެލް އޮފްސައިޑް ވެފައިވުމުން އެ ގޯލު ރެެފްރީއިން ބަލައެއް ނުގަތެވެ.

މެޗުގައި ޑައިނަމޯ ގެ ގޯލް ކީޕަރުގެ ފަރާތުން ވަނީ ތަފާތު މޮޅު ކުޅުމެއް ފެނިގެން ގޮސްފައެވެ.

ޗެލްސީއާއި ޑައިނަމޯގެ އިތުރުން ޗެމްޕިއަންސް ލީގުގެ އެ ގްރޫޕުގައި ހިމެނެނީ ޖަރުމަނުގެ ލެއިޕްޒިގެ އަދި އިޓަލީގެ އޭސީ މިލާނެވެ.