ނިމިދިޔަ ހޫނު މޫސުމުގެ ޓްރާންސްފާ ވިންޑޯގައި 280 މިލިއަން ޔޫރޯ ހަރަދުކޮށް އެކަށީގެންވާ ނަތީޖާއެއް ނުނެރެވުމުން ޗެލްސީގެ ކޯޗު ކަމުން ތޯމަސް ޓުޝެލް ވަކި ކޮށްފިއެވެ.

ޗެލްސީއިން މިކަމާއި ގުޅިގެން ނެރެފައިވާ ބަޔާނެއްގައި ބުނެފައިވަނީ ޓުޝެލް މަގާމުން ވަކި ކުރަން ނިންމާފައިވާ ކަމަށާއި، އެ

ޓީމަށް އޭނާ ވެދިން އެހީތެރިކަމަށާއި ހޯދަދިން ކާމިޔާބީ ތަކަށް ޝުކުރު އަދާކުރާ ކަމަށެވެ. އަދި މިއީ ޗެލްސީގެ އައު ވެރިންނަށް މި ވަގުތު ޓީމަށް ފެންނަ އެންމެ ރަނގަޅު ގޮތް ކަމަށްވެސް ޗެލްސީގެ ބަޔާނުގައި ބުނެފައިވެއެވެ.

ފާހަގަ ކޮށްލެވޭ ގޮތުގައި 2021 ވަނަ އަހަރުގެ ޖަނަވަރީ މަހު ޓުޝެލް ޗެލްސީއާއި ހަވާލު ވުމަށްފަހު އެ ސީޒަނުގައި އޭނާ ވަނީ އެ ޓީމަށް ޗެމްޕިއަންސް ލީގު، ސުޕަ ކަޕް އަދި ކްލަބް ވޯލްޑް ކަޕް ވެސް ހޯދަ ދީފައެވެ.

އައު ވެރިންނާއި އެކު މި ސީޒަނަށް ޗެލްސީއިން ކުރިމަތިލީ ބޮޑު ހަރަދެއްކޮށް ވަރުގަދަ ޓީމަކާއި އެކުގައެވެ. ނަމަވެސް އެ ޓީމުން ޕްރިމިއާ ލީގުގައި މިހާތަނަށް ކުޅުނު 6 މެޗުގެ ތެރެއިން މޮޅުވެފައިވަނީ އެންމެ ދެ މެޗުންނެވެ. މިވަގުތު ޕްރިމިއާ ލީގުގެ 6 ވަނައިގައި އޮތް ޗެލްސީއިން ޗެމްޕިއަންސް ލީގުގެ ގްރޫޕް ސްޓޭޖުގައި ކުޅުނު ފުރަތަމަ މެޗުންވެސް ރޭ ވަނީ ބަލިވެފައެވެ.

މި ސީޒަނަށް ޗެލްސީއިން ގެނައި 6 ކުޅުންތެރިންގެ ތެރޭގައި އާސެނަލްގެ ކުރީގެ ކެޕްޓަން އަބަމަޔާންގް ގެ އިތުރުން ލެސްޓާ ސިޓީއިން ގެނައި ފޮފާނާ ވެސް ހިމެނެއެވެ.

މި ހަފްތާ ތެރޭ ޗެލްސީއިން އައު ކޯޗެއް އައްޔަނު ކުރާނެ ކަމަށް ބެލެވޭ އިރު، ލިސްޓުގެ ކުރީގައި އުޅެނީ ބްރައިޓަންގެ ކޯޗު ޕޮޓާ، ޕީއެސްޖީގެ ކުރީގެ ކޯޗު ޕޮޗެޓީނޯ އަދި ޒިދާން އެވެ.