ޗެމްޕިއަންސް ލީގުގެ އެންމެ ފަހުގެ ޗެމްޕިއަން ރެއާލް މެޑްރިޑުން ސެލްޓީކް ބަލިކޮށް މި ސީޒަނުގެ ފެށުން ރަނގަޅު ކޮށްފިއެވެ.

ސެލްޓިކް ނިސްބަތްވާ ސްކޮޓްލޭންޑުގެ ގްލާސްގޯ ގައި ކުޅުނު މި މެޗު ރެއާލުން ކާމިޔާބު ކޮށްފައިވަނީ 0-3 ގެ ނަތީޖާއަކުންނެވެ. މިދިޔަ ސީޒަނުގައި ރެއާލުން ޗެމްޕިއަންސް ލީގު ކާމިޔާބު ކުރި ނަމަވެސް އެ ޓީމުން މިދިޔަ ސީޒަނުގެ ފެށުން މިހާ ރަނގަޅު ނޫންކަން ފާހަގަ ކޮށްލެވެއެވެ.

ރޭގެ މެޗުން ރެއާލް މޮޅުވި ނަމަވެސް އެ ޓީމުގެ ކެޕްޓަން ކަރިމް ބެންޒެމާ އަށް ވަނީ އަނިޔާވެ ބާލަން ޖެހިފައެވެ. މެޗަށްފަހު ވާހަކަ ދައްކަމުން ރެއާލްގެ ކޯޗު ކާލޯ އެންޖެލޯޓީ ބުނެފައިވަނީ ބެންޒެމާގެ އަނިޔާގެ ސީރިއަސް ކަން އިނގިގެންދާނީ އިތުރު ޓެސްޓުތައް ހެދުމުން ކަމަށެވެ. އަދި ސެލްޓިކް ގެ ދަނޑުގައި ލިބިގެން މި ދިޔައީ އުނދަގޫ މޮޅެއް ކަމަށްވެސް އެންޖެލޯޓީ ބުނެފައިވެއެވެ.

މެޗުގެ ފުރަތަމަ ހާފުގައި އެއްވެސް ޓީމަކަށް ގޯލެއް ނުޖެހުނު ނަމަވެސް ދެވަނަ ހާފު ފަށައިގެން 11 މިނަޓު ތެރޭގައި ވިނިސަސް ޖޫނިއާ ވަނީ ރެއާލްއަށް ލީޑު ނަގައިދީފައެވެ. އޭގެ ހަތަރު މިނަޓު ފަހުން ރެއާލްއަށް ލީޑު ފުޅާ ކޮށްދިނީ ލުކާ މޮޑްރިޗް އެވެ.

ރެއާލްގެ ފަހު ގޯލު މެޗުގެ 77 ވަނަ މިނަޓުގައި ކާމިޔާބު ކޮށްދިނީ އެޑެން ހަޒާޑެވެ. މިއީ މި ސީޒަނުގައި އޭނާ ޖަހައިދިން ފުރަތަމަ ގޯލެވެ. އިނގިރޭސި ވިލާތުގެ ޗެލްސީ ދޫކޮށް ހަޒާޑު ރެއާލްއަށް ބަދަލުވި ފަހުން އޭނާ ވަނީ އަނިޔާގެ އެތައް މައްސަލަ އަކާއި ކުރިމަތިލާން ޖެހި، އެންމެ އެދެވޭ ކުޅުން ދެއްކޭ ގޮތް ނުވެފައިކަން ފާހަގަ ކޮށްލެވެއެވެ.

ރެއާލް އަދި ސެލްޓިކް ހިމެނޭ ގުރޫޕް އެފް ގައި ރޭ ކުޅެވުނު އަނެއް މެޗުގައި ޝަކްތަރު ޑޮނެސްކް ވަނީ 1-4 އިން ލެއިޕްޒިގެ ބަލިކޮށްފައެވެ. މި ނަތީޖާ އާއި އެކު ގުރޫޕުގެ އެއްވަނައިގައި ރެއާލް، ދެވަނައިގައި ޝަކްތަރު އޮތް އިރު ތިންވަނައިގައި އޮތީ ސެލްޓިކެވެ. ގުރޫޕުގެ ފުލުގައި އޮތީ ލެއިޕްޒިގް އެވެ.