ޗެމްޕިއަންސް ލީގުގައި އިޓަލީގެ ނަޕޯލީއިން ލިވަޕޫލް ޑިފެންސް ލައިންގެ ހުރިހާ ދޮރެއް ހުޅުވާލާ އެ ޓީމު ކޮޅަށް ހަތަރު ގޯލު ޖަހައިފިއެވެ.

ޗެމްޕިއަންސް ލީގުގެ ގްރޫޕް އޭގެ މި ދެ ޓީމުން ކުޅުނު މި މެޗު ނަޕޯލީ އިން ކާމިޔާބު ކޮށްފައިވަނީ 1-4 ގެ ނަތީޖާއަކުންނެވެ.

ނަޕޯލީގެ ދަނޑުގައި މިހާތަނަށް މޮޅުވެފައިނުވާ ލިވަޕޫލަށް މެޗު ފެށުމާއި އެކު ވަނީ މެޗުގެ ކޮންޓްރޯލް ގެއްލިފައެވެ. މި މެޗުގައި ނަޕޯލީގެ ފަރާތުން ފުރަތަމަ މިނެޓުން ފެށިގެންވެސް ވަނީ ތަފާތު ކުޅުމެއް ދައްކާފައެވެ. އެގޮތުން މެޗުގެ ލީޑު ނަޕޯލީއިން ނަގާފައިވަނީ މެޗުގެ 5 ވަނަ މިނަޓުގައި ލިބުނު ޕެނަލްޓީއަކުން ޕިއޯ ޒިއެލެންސްކީއެވެ.

މެޗުގެ 18 ވަނަ މިނަޓުގައި ނަޕޯލީއަށް އިތުރު ކޯނަރެއް ލިބުނު ނަމަވެސް އެ ޓީމުގެ އޮސިމްހެން ޖެހި ބޯޅަ ވަނީ ލިވަޕޫލުގެ ގޯލް ކީޕަރ އެލިސަން ހިފަހައްޓާފައެވެ. ނަމަވެސް މެޗުގެ 31 ވަނަ މިނަޓުގައި ހުއްޓުމެއް ނެތި އެޓޭކް ކުރަމުން ދިޔަ ނަޕޯލީއިން ވަނީ ލީޑު ފުޅާކޮށްފައެވެ. މި ގޯލު އެ ޓީމަށް ކާމިޔާބު ކޮށްދީފައިވަނީ އެންގުއިސާއެވެ. އަދި މެޗުގެ ފުރަތަމަ ހާފު ނިމެން މިނަޓަކަށް ވެފައި ވަނިކޮށް ނަޕޯލީގެ ޖިއޮވާނީ ސިމިއޯނޭ ވަނީ އެ ޓީމަށް ތިންވަނަ ގޯލެއް ޖަހައިދީފައެވެ.

މެޗުގައި ނަޕޯލީ އިން ޖެހި ފަހު ގޯލު ޖަހައިދިނީ ދެވަނަ ހާފުގެ ދެވަނަ މިނަޓުގައި ފުރަތަމަ ގޯލުވެސް ޖަހައިދިން ޒިލެންސްކީއެވެ. ލިވަޕޫލުން ޖެހި ހަމައެކަނި ގޯލު އެ ޓީމަށް ޖަހައިދިނީ ލުއިސް ޑިއާޒް އެވެ.

ގްރޫޕް އޭގައި ދެން ހިމެނޭ އަޔަކްސް އަދި ރޭންޖާސް ބައްދަލުކުރި މެޗު 0-4 އިން ކާމިޔާބުކޮށް ގްރޫޕުގެ އެއްވަނަ އަށް އަރާފައެވެ. ދެވަނައިގައި ނަޕޯލީ އަދި ތިންވަނަައިގައި ލިވަޕޫލް އޮތް އިރު ފުލުގައި އޮތީ ރޭންޖާސްއެވެ.