މުޅި ހަޔާތުގައި ވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކޮށްދޭހާ އިޚްލާސްތެރިކޮށް ރައްޔިތުންނަށް ކަންތައް ކޮށްދޭން ބޭނުންފުޅުވާ ރައީސަކު ފެނިވަޑައިގެންފައިނުވާ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
”ސޯސަލް“ އަށް ދެއްވި ބަސްދީގަތުމެއްގައި، އަންނަ ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން އާޒިމް ތާއީދު ކުރައްވާނީ ކޮން ކެންޑިޑޭޓަކަށްތޯ މީހަކު ކުރި ސުވާލަކަށް ޖަވާބު ދެއްވަމުން، އާޒިމް ވިދާޅުވީ، ރައީސް ޞާލިހަކީ ގައުމަށް ވަރަށް އިޚްލާސްތެރިކޮށް މަސައްކަތް ކުރައްވާ ރައީސެއް ކަމަށެވެ.
”އަޅުގަނޑު ހަމަ ހިތުގެ އަޑިން ގަބޫލު ކުރަން ރައީސް ރައްޔިތުންނަށް ކަންތައްތައް ކޮށްދެނީ ހަމަ ވަރަށް ކޮށްދޭ ހިތުންކަން. ކޮންމެ ބަހެއް ވިދާޅުވަނީވެސް އެކަމެއް ހަމަ ކޮށްދިނުމުގެ ނިޔަތުގައިކަން. އަދި ކޮށްދޭން ބޭނުންފުޅުވާތީކަން.“
އެމްޓީސީސީގެ ސީއީއޯ އާދަމް އާޒިމް
މިއާއެކު އާޒިމް ވިދާޅުވީ އޭނާ އެމްޓީސީސީއާ ހަވާލުވެވަޑައިގެންނެވި ފަހުން ގިނަ މަޝްރޫއުތަކެއް ހިންގަމުން އަންނައިރު، އެ ހުރިހާ މަޝްރޫއުތައްވެސް އެންމެ ފުރިހަމައަށް، އަދި ރައްޔިތުން އެދޭ ގޮތަށް ކުރިއަށް ގެންދެވުމަށް ރައީސް ސޯލިހު ނަސޭހަތްތެރިވެވަޑައިގަންނަވާ ކަމަށެވެ.
"އެހެންވީމާ އަޅުގަނޑުގެ މުޅި މިހަޔާތުގައި، ވޯކިންގް ކެރިއަރުގައި ވެސް މިހާ އިހްލާސްތެރިކޮށް ރައްޔިތުންނަށް ކަމެއް ކޮށްދޭން ބޭނުންފުޅުވާ ރައީސެއް ފެނިފައެއް ނެތް."
އެމްޓީސީސީގެ ސީއީއޯ އާދަމް އާޒިމް
މި ސަބަބު ތަކާއި ހުރެ، ކުރިއަށް އޮތް ރިޔާސީ އިންތިޚާބުގައި އާޒިމް ހުންނަވާނީ ރައީސް ޞާލިހާއި އެކުގައި ކަމަށްވެސް އޭނާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
