މާދަމާގެ ޙާލަތު ރަނގަޅު ކުރެވޭނީ މިއަދުގެ ޙާލަތު ވަރަށް ރަނގަޅަށް އެނގިގެން ކަމަށް، ހޯމް މިނިސްޓަރ އަދި އަދާލަތުޕާޓީގެ ރައީސް ޢިމްރާން ވިދާޅުވެއްޖެއެވެ. 

ގައުމުގެ އިޖުތިމާއީ ފޭރާން ފުނޑުފުނޑުވެ، ހާލަތު ބޮއްސުންލަމުންދާ މި ދަނޑިވަޅުގައި، ޢިމްރާން މިއަދު ކުރެއްވި ޓުވީޓެއްގައި ވިދާޅުވީ، މާދަމާގެ ޙާލަތު ރަނގަޅު ކުރެވޭނީ މިއަދުގެ ޙާލަތު ވަރަށް ރަނގަޅަށް އެނގި ވަޒަން ކުރެވިގެން ކަމަށެވެ.

މި ފަހަކަށްއައިސް، ދޭތެރެ ދޭތެރެއިން ޢިމްރާން އަންނަނީ މުޖުތަމައުގެ ހާލަތާއި، އެނޫންވެސް ކަންކަމާއި ގުޅޭ ގޮތުން ޚިޔާލު ފާޅުކުރައްވައި ޓުވީޓު ކުރައްވަމުންނެވެ. އެއިން ކޮންމެ ޓުވީޓަކަށްވެސް ގިނަ ބައެއްގެ ފާޑުކިޔުންތައް އަންނަނީ އަމާޒުވަމުންނެވެ.

އެގޮތުން، އެއްޖިންސުން ގުޅުން ހިންގުމާއި، ހަށި ވިއްކުމާއި، ވައްކަމާއި މާރާމާރީ ފަދަ ކުށްތައް މުޖުތަމައުއިން މަދު ކުރުމުގެ ޒިންމާ އުފުލަންޖެހޭ ފަރާތުން، އެފަދައިން މަސައްކަތް ނުކުރައްވައި، ހަމަ އެކަނި ޓުވީޓަކުން ކުށްތައް ހުއްޓުވުމަށް މަސައްކަތް ކުރައްވާ ކަމަށް އެފަރާތްތަކުން ބުނެއެވެ.