ބޯހިމެނުމުގެ މަސައްކަތުގައި އަތޮޅުތެރޭގެ 99 އިންސައްތަ މަސައްކަތް ނިމިފައިވާ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް ވިދާޅުވެއްޖެއެވެ.

ޕީއެސްއެމްގެ ރާއްޖެ މިއަދު ޕްރޮގުރާމުގައި ވާހަކަ ދައްކަވަމުން ސްޓެޓިސްޓިކަލް އޮފިސަރ ހުދާ ހަލީމް ވިދާޅުވީ އަތޮޅު ތެރޭގައި ބޯހިމެނުމުގެ މަސައްކަތް ކާމިޔާބު ކަމާއިއެކު ނިންމުމުގައި ކައުންސިލްތަކާއި، އާންމު ރައްޔިތުންގެ ފަރާތުން ބޮޑު އެއްބާރުލުމެއް ލިބިގެން ގޮސްފައިވާކަމަށެވެ.

އެގޮތުން އެ މަސައްކަތުގެ ދަށުން މިހާޜު އަތޮޅުތެރޭގެ ބޯހިމެނުމުގެ މަސައްކަތުގެ 99 އިންސައްތަ ނިމިފައިވާ ކަމަށް ހުދާ ވިދާޅުވިއެވެ.

Advertisement

ހުދާ ވިދާޅުވީ، ބޯހިމެނުމުގެ މަސައްކަތުގެ މައުލޫމާތު ނަގަމުންދަނީ ޓެބްލެޓުގައި ކަމަށްވުމުން މިހާރު މަސައްކަތް ކުރަމުންދަނީ ޓެބްލެޓްތައް މާލެ ގެނެސް މައުލޫމާތުތައް އެއްކުރުމުގެ މަސައްކަތް ކަމަށެވެ. އެހެން ނަމަވެސް ބޯހިމެނުމުގެ މަސައްކަތް މާލެ ސަރަހައްދުގައި ގޮންޖެހުންތަކެއް ހުރިކަން ބިއުރޯ އޮފް ސްޓެޓިސްޓިކްސް އިން ފާހަގަކުރައްވައެވެ.

އެއީ އެކަށީގެންވާ ވަރަށް އެނިއުމޭޓަރުން ނެތުމުގެ މައްސަލައެވެ. 

ބިދޭސީންގެ މައުލޫމާތު އެއްކުރުމުގައި އިސްކޮސް ހަރަކާތްތެރިވާ އަންވަރު އަލީ ވިދާޅުވީ، ކުރިއަށް އޮތް ހަތަރު ދުވަހުވެސް ތަފާތު ބަސްތައް އެނގޭ ފަރާތްތަކުގެ އެއްބާރުލުން ލިބިގެން ދިއުމަކީ މިމަސައްކަތަށް އިތުރު ކުރިއެރުމެއް ލިބިގެންދާނެ ކަމެއްކަމަށް އަންވަރު ވިދާޅުވިއެވެ. މާލެ ސައަހައްދުގައި ބޯހިމެނުމުގެ މައުލޫމާތު އެއްކުރުމުގެ އެންމެ ފަހު ދުވަހަކީ މިމަހުގެ 27 ވަނަ ދުވަހެވެ. 

ބޯހިމެނުމުގެ މަސައްކަތަކީ ޤައުމުގެ ޙާލަތު ވަޒަންކޮށް ކުރިމަގުގައި ކުރިއަށްގެންދާ މަޝްރޫޢުތައް ޕްލޭންކުރުމަށް މަގުފަހިކުރުމަށް ބޭނުންވާ މަޢުލޫމާތު އެއްކުރުމަށް ކުރިއަށްގެންދާ ޤައުމީ ތަރައްޤީގެ މަސައްކަތެކެވެ. މިމަސައްކަތް ކުރިއަށް ގެންދަނީ ކޮންމެ 10 އަހަރަކުން އެއްއަހަރު އެވެ.