މިވަގުތު ބުރުނާއީ ގައި ތިބި ރާއްޖޭގެ ގައުމީ ފުޓްބޯޅަ ޓީމުން ކުޅުނު އެކުވެރިކަމުގެ ދެވަނަ މެޗުގައި ލާއޮސް ވެސް ބަލިކޮށްފިއެވެ.
މިއަދުގެ މެޗު ރާއްޖޭގެ ޓީމުން 1-3 ގެ ނަތީޖާއަކުން ލާއޮސް ގެ މައްޗަށް ކުރި ހޯދިއިރު ގައުމީ ޓީމުން އެންމެ ފަހުން ކުޅުނު ތިން މެޗުވެސް މިވަނީ ކާމިޔާބުކޮށްފައެވެ. ރާއްޖެއިން ބުރުނާއީގައި އެންމެ ފުރަތަމަ އެ ގައުމުގެ ފުޓްބޯޅަ ޓީމާއި ދެކޮޅަށް މިދިޔަ ބުދަ ދުވަހު ކުޅުނު މެޗު ކާމިޔާބުކުރީ 0-3 ގެ ނަތީޖާއަކުންނެވެ. މި ދެ މެޗަކީވެސް ފީފާ ރަޖިސްޓްރީގައި ހިމެނިގެން ރޭންކިން އަށް ގުނޭ ގޮތަށް ކުޅުނު ދެ މެޗުކަން ފާހަގަކޮށްލެވެއެވެ.
މެޗުގައި ރާއްޖެއިން ވަނީ ކުރީކޮޅު މެޗުގެ ކޮންޓްރޯލް ހޯދާ ލީޑު ނަގާފައެވެ. އެގޮތުން މެޗުގެ 11 ވަނަ މިނަޓުގައި ރާއްޖެއަށް ލީޑު ނަގައިދިނީ ހަސަން ރާއިފް އަހުމަދު (ހަންނަ) އެވެ. ހަންނަ ވަނީ ބުދަ ދުވަހު ބުރުނާއީ އާއި ދެކޮޅަށް ކުޅުނު މެޗުގައިވެސް ގޯލެއް ކާމިޔާބު ކޮށްދީފައެވެ. ރާއްޖެއިން ފުރަތަމަ ހާފުގައި ރަނގަޅު ކުޅުމެއް ދެއްކި ނަމަވެސް ލާއޮސްގެ ކެޕްޓަން ބޯންޕަޗަން ބޯންކޯންގް ވަނީ ފުރަތަމަ ހާފުގެ ފަހު މިނަޓުގައި އެ ޓީމަށް ނަތީޖާ ހަމަހަމަ ކޮށްދީފައެވެ.
ދެވަނަ ހާފުގައި ރާއްޖެއަށް އަލުން ލީޑު ނަގައިދީފައިވަނީ ހުސެއިން ނިހާން (ނިހާޓް) އެވެ. ރާއްޖޭގެ ލީޑު ފުޅާކޮށްދިނީ ބުރުނާއީ ކޮޅަށްވެސް ގޯލު ޖަހައިދިން އިބްރާހިމް ވަހީދު ހަސަން (އިއްބެ) އެވެ.
ރާއްޖޭގެ ތިންވަނަ ގޯލަށް ފަހު ދެ ޓީމުންވެސް ވަނީ ނުރައްކާތެރި ހަމަލާތަކެއް އިދިކޮޅު ޓީމުގެ ގޯލަށް ފޮނުވާލާފައެވެ. ފަހު ވަގުތު ރާއްޖޭގެ ގޯލްކީޕަރު ހުސެއިން ޝަރީފްގެ މަސައްކަތް ފާހަގަ ކޮށްލެވެއެވެ.
Advertisement
This content is created and paid for by advertisers and does not involve Voice Journalists
