މޯލްޑިވްސް ޕޯޓްސް ލިމިޓެޑު (އެމްޕީއެލް)އިން "ޕޯޓު ޑިޖިޓަލްކޮށްގެން" ނަމުގައި ފަށައިގެން ކުރިއަށްގެންދާ ކެންޕެއިންގެ ދަށުން ނީލަން ކިޔާ ތަކެއްޗަށް ޚާއްސަ ޕޯޓަލްއެއް އަލަށް ތައާރަފުކޮށްފިއެވެ.

އެމްޕީއެލްގެ 36 ވަނަ އަހަރީ ދުވަހާއި ގުޅުވައިގެން ބޭއްވި ޚާއްސަ ރަސްމިއްޔާތުގައި ވަނީ ނީލަން ކިޔާ ތަކެއްޗަށް ޚާއްސަ ޕޯޓަލްއާއެކު އިތުރު ޑިޖިޓަލް ދެ ޚިދުމަތެއް ތައާރަފުކޮށްފައެވެ. 

އެގޮތުން އެކުންފުނިން ތައާރަފުކުރި "އެމްޕީއެލް އޮކްޝަން ޕޯޓަލް" ހާއްސަކޮށްފައި ވަނީ ރާއްޖެ އެތެރެ ކުރުމަށް ފަހު ކްލިއާނުކޮށް ގިނަ ދުވަސްވެފައި ހުންނަ މުދާ އެމްޕީއެލް ސަރަހައްދަށް ނުގޮސް، ނީލަމުގައި ގަނެވޭނެ ގޮތް ހެދުމަށް ކަމަށް އެމްޕީއެލް އިން ބުނެއެވެ. އެ ޕޯޓަލް މެދުވެރިކޮށް، ނީލަން ކިޔަން ނިންމާފައިވާ ތަކެތި ބަލައިލުމާއި ނީލަމަށް އެންމެ ފަހުން ހުށަހަޅާފައިވާ އަގުގެ މައުލޫމާތު ބެލޭނެއެވެ.

Advertisement

މީގެ އިތުރުން އެކުންފުނިން އަލަށް ތައާރަފުކުރި ޖޮބް ޕޯޓަލްއިން އެ ކުންފުނިން ހުސްވެފައި ހުރި ވަޒީފާގެ ފުރުސަތުތައް ބެލުމުގެ އިތުރުން ވަޒީފާއަށް އެދި ހުށަހެޅުމާއި އެ ހުށަހެޅުމާބެހޭ ފަހުގެ މައުލޫމާތު ބަލައިލެވޭނެ ކަމަށްވެސް ބުންޏެވެ.

އެމްޕީއެލް އިން ބުނީ އެ ޕޯޓަލްތައް ތައާރަފު ކުރުމުގެ ބޭނުމަކީ އެމްޕީއެލްގެ މުވައްޒަފުންނަށާއި ކަސްޓަމަރުންނަށް ވެސް މިހާރަށް ވުރެ އަވަހަށް އަދި ފަސޭހައިން ޚިދުމަތްތައް ލިބޭނެ ގޮތް ހަމަޖެއްސުން ކަމަށެވެ.