މާލޭ ވިޔަފާރި ބަނދަރުގެ ޖާގައިގެ ދަތިކަން ވަރަށް ބޮޑު ކަމަށާ، އެހެން ނަމަވެސް އެ ބަނދަރަށް އެކަށިގެންވާ ޖާގައެއް މާލެލޭގައި ނެތް ކަމަށާ އެކަމަށް އޮތް ހައްލަކީ އެ ބަނދަރު ގުޅީފަޅަށް ބަދަލުކުރުން ކަމަށް ރައީސުލްޖުމްހުރިއްޔާ އިބްރާހިމް މުހައްމަދު ޞާލިހް ވިދާޅުވެއްޖެ އެވެ.
ރޭ އޮތް އެމްޕީއެލްގެ 36 ވަނަ އަހަރީ ޖަލްސާގައި ވާހަކަދައްކަވަމުން ރައީސް ވަނީ މި ސަރުކާރުން ވިޔަފާރި ބަނދަރު ތަރައްޤީކޮށް އިޤްތިޞާދީ ދުވެލި ބާރުކުރުމަށް ކުރަމުންދާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ. އެގޮތުން އަތޮޅުތެރޭއާއި މާލޭގެ ވިޔަފާރި ބަނދަރުތަށް ތަރައްގ ކުރުމަށް ކުރެވެމުންދާ މަސައްކަތްތަކަށް ރައީސް ޞާލިހު ވަނީ އަލިއަޅުވާލައްވާފައެވެ.
އެގޮތުން ދެއްކެވި ވާހަކަފުޅުގައި އެމަނިކުފާނު ވަނީ، ރަނގަޅު ފެންވަރުގެ ތަރައްގީވެފައި އޮތް ވިޔަފާރި ބަނދަރެއްް ރާއްޖޭގައި އޮތްނަމަ ގައުމަށް ލިބޭ އާމްދަނީ މިހާރަށްވުރެ ރަނގަޅުވާނެކަން ފާހަގަކުރައްވާފައެވެ. އެހެން ނަމަވެސް، ރާއްޖޭގެ އިގްތިސާދުގެ މައި ހަބު ކަމުގައިވާ މާލޭގެ ވިޔަފާރި ބަދަރަށް ޖާގައިގެ ދަތިކަން އިންތިހާއަށް ކުރިމަތިވެފައިވާ، ކަމަށާ، އެކަން ހައްލުކޮށް، އެދެވޭ ފެންވަރުގެ ބަނދަރެއް ހަދާނެ ޖާގަވެސް މާލޭގައި ނެތްކަން އެމަނިކުފާނުގެ ވަނީ ފާހަގަކުރައްވާފައެވެ.
"މާލޭ ވިޔަފާރި ބަނދަރުގެ ޖާގައިގެ ދަތިކަން މިހާރު ވެސް ވަރަށް ބޮޑު. އެކަމުގެ ސަބަބުން ރައްޔިތުންނަށް ފެންވަރު ރަނގަޅު ހިދުމަތް ދިނުމުގައި ވަރަށް ގިނަ ދަތިތަކެއް އެބަ ކުރިމަތިވޭ. ވިޔަފާރި ބަނދަރަކަށް އެކަށިގެންވާ ޖާގައެއް މާލެއަކު ނެތް. އަދި ބަނދަރު ބޮޑުކުރެވޭކަށް ވެސް މާލެއަކު ނެތް" ރައީސް ވިދާޅުވި އެވެ.
އެހެންކަމުން މާލޭގެ ވިޔަފާރި ބަނދަރަށް ދިމާވެފައި އޮތް ޖާގައިގެ ދަތިކަން ހައްލުކުރުމަށް ގުޅިފަޅުގައި ބަނދަރަށް ބޭނުންވާ ބިމުގެ އެއްބައި މިހާރު ހިއްކައި ނިމިފައިވާ ކަމަށް އެމަނިކުފާނު ވިދާޅުވި އެވެ. އެއާއެކު ވިޔަފާރި ބަނދަރާއި މާލޭ ސަރަހައްދުގައި ހުރި ބަނދަރުތަކުގެ އިތުރުން ގުދަންތައްވެސް ގުޅިފަޅަށް ބަދަލުކުރަން ވަނީ ނިންމާފަ އެވެ.
"ގުޅިފަޅަށް މާލޭ ވިޔަފާރި ބަނދަރު ބަދަލުކުރުމުން، ބަނދަރުގެ ޙަރަކާތްތައް ހަލުވިވެ، ޚިދުމަތްތައް އަވަސްވެގެންދާނެ. އަދި މާލެ ސަރަޙައްދުގައި ހުރި ބަނދަރުތަކާއި ގުދަންތައް ގުޅިފަޅަށް ބަދަލުކުރެވޭނެ. އަޅުގަނޑުމެން ގުޅިފަޅުގައި ބަނދަރު ތަރައްޤީކުރަނީ، މާލޭ ވިޔަފާރި ބަނދަރާއި، މާލޭ އުތުރު ބަނދަރާއި މާލޭގެ ދެކުނު ބަނދަރުގެ ހަރަކާތްތަކަށްވެސް ޖާގަ ލިބޭ ވަރަށް" ރައީސް ވިދާޅުވި އެވެ.
މި މޭރުމުން އިތުރަށް ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ތިލަފުށީގައި މިހާރު ތަރައްޤީކުރަމުން އަންނަ ބަލްކު ޓާމިނަލް، މަޝްރޫޢު ނިމުމުން މިހާތަނަށް މާލޭގެ ވިޔަފާރި ބަނދަރުން ނުދޭ ޚިދުމަތްތައް ފޯރުކޮށްދިނުމަށް އެމް.ޕީ.އެލް އިން ތައްޔާރުވަމުންދާކަމުގައި ވިދާޅުވެފައެވެ. އެގޮތުން ހިލަޔާއި ހިލަވެލި އެތެރެކުރަން ބޭނުންވާ ވިޔަފާރިވެރިންނަށް ވެސް އަދި ޢާންމުންނަށް ވެސް ވަރަށް ބޮޑު ފަސޭހަތަކެއް ލިބޭނެކަމުގައި އެމަނިކުފާނު ފާހަގަކުރެއްވެވިއެވެ.
މިގެ އިތުރުންވެސް މި ބަނދަރުތައް ތަރައްޤީކުރުމުން ލިބިގެންދާނެ ފައިދާތަކަށް އަލިއަޅުއްވާލައްވަމުން އެމަނިކުފާނު ވިދާޅުވީ މާލޭގެ ތޮއްޖެހިފައިވާ އާބާދީގެ ތެރޭގައި ހިންގާ ޞިނާޢީ ބޮޑެތި ޙަރަކާތްތައް މަދުވާނެކަމަށާއި، މިހާރު މާލޭގައި ހިންގާ ބަނދަރުތަކުގެ ބިންތައް، މާލޭގައި ދިރިއުޅޭ ރައްޔިތުންނަށް ބޭނުންވާ އެހެން ޚިދުމަތްތަކަށް ބޭނުންކުރެވޭނެ ގޮތްވެގެންދާނެކަމަށެވެ.
Advertisement
This content is created and paid for by advertisers and does not involve Voice Journalists
