ޖަލުގައި ހުކުމް ތަންފީޒުކުރަމުން ދަނިކޮށް މީހުން މަރުވުމުގައި އިހުމާލުއް އޮތްކަން ނުވަތަ ނޫންކަން ވެސް ނިންމަވާނީ ހޯމް މިނިސްޓަރ ޢިމްރާން ނޫން ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ. 

ވައްޑެ މިފަދައިން ވިދާޅުވެފައި ވަނީ، މާފުށި ޖަލުގައި ޝަރީއަތް ނިމެންދެން ބަންދުކޮށްފައި ހުއްޓައި، މ. މުލި، ހުދުފިނިފެންމާގޭ، މުހައްމަދު ނަޝީދުގެ މިދިޔަ ހަފުތާގައި މަރުވި މައްސަލައިގައި މޯލްޑިވްސް ކަރެކްޝަންސް ސާވިސްގެ އިހުމާލެއް ނެތް ކަމަށް އިމްރާން ވިދާޅުވެފައިވާ ކަމަށް ނޫހަކުން ރިޕޯޓްކުރުމާއި ގުޅިގެން ނެވެ. 

އެކަމާއި ގުޅިގެން ވައްޑެ ކުރެއްވި ޓުވީޓުގައި ވިދާޅުވީ، އެފަދަ މައްސަލަ ތަކުގައި އިހުމާލެއް އޮތްކަން ނުވަތަ ނެތްކަން ނިންމަވާނީ މިނިސްޓަރެއް ނޫންކަމަށެވެ. އަދި އެކަން ނިންމަންޖެހޭނީ ‎ހިޔުމަން ރައިޓްސް ކޮމިޝަންގެ ތަޙުޤީޤަކުން ކަމަށްވެސް ވައްޑެ ވިދާޅުވިއެވެ. 

ނަޝީދު، 43، މަރުވީ އޭނާ ނޭވާ ނުލާކަން ގޮޅީގައި ތިބި އެހެން ގައިދީންތަކެއް އެންގުމުން އިތުރު ފަރުވާ ދެމުން އަންނަނިކޮށް ކަމަށް ކަރެކްޝަންސް އިން މީގެ ކުރިން ބުނެފައިވެ އެވެ. އޭނާ މަރުވުމުގައި ކަރެކްޝަންސްގެ އިހުމާލު އޮތް ކަމަށް އާއިލާއިން ތުހުމަތު ކުރެ އެވެ.

އެކަމާ ގުޅިގެން އޮންލައިން ނޫހަކުން ސުވާލުކުރުމުން، އޭނާގެ މަރުގެ ހަބަރު ލިބުމުން މާފުށީ ޖަލުގައި ތިބި އޮފިސަރުން ހެދި ރިޕޯޓާއި އިތުރު އެހެން މެޑިކަލް ރިޕޯޓުތައް ބެއްލެވި ކަމަށް އިމްރާން ވިދާޅުވި ކަމަށް އެ ނޫހުގައި ބުނެފައިވެއެވެ.

"އެކަމުގައި އަޅުގަނޑަކަށް ކަރެކްޝަންސްގެ އިހުމާލެއް އޮތް ކަމަކަށް އަދި އެއްވެސް މީހެއްގެ ގަސްދުގައި ކޮށްފައި އޮތް އެއްވެސް އަމަލެއް ނެތް. އަޅުގަނޑު ވަރަށް ގާތުން އެކަން ބެލިން،" އިމްރާން އެ ނޫހަށް ދެއްވި ބަސްދީގަތުމެއްގައި ވިދާޅުވި ކަމަށް އެ ނޫހުގައި ވެއެވެ.