ބަންގްލަދޭޝްގެ ފިރިހެނެއް ކަމަށްވާ އެމްޑީ އަލަމްގީރާ އެކު އެއްޖިންސުން ގުޅުން ހިންގި ކަމަށް އިއުތިރާފް ވުމުމުން ރައްޔިތުންގެ މަޖިލީހުގެ ރައީސް މުހައްމަދު ނަޝީދު ގެ ކޮއްކޮ، އަދި ގާނޫނީ ވަކީލު ނާޒިމް ސައްތާރަށް ކްރިމިނަލް ކޯޓުން އަދަބު ކަނޑައެޅި އިރު ގާނޫނާ ހިލާފަށް އަދަބު ލުއި ކޮށްފައިވާކަން ޕީޖީ ޝަމީމްގެ ލިޔުމަކުން ހާމަވެއްޖެއެވެ. 

"އަދަބު އިސްތިއުނާފް ކުރުން- އަބަދުވެސް ހިނގާ ކަމެއް" ނަމުގައި ޕީޖީ ޝަމީމް އިއްޔެ އޭނާގެ ބްލޮގުގައި ލިޔުއްވާފައިވް ލިޔުމުގައި ވާގޮތުން ގާނޫނުލްއުގޫބާތުގައި އޮންނަ ގޮތުން، ދައުވާ ކުރުމުގެ ކުރިން ކުށަށް އިއުތިރާފުވެ އާންމުންގެ ކިބައިން މާފަށް އެދޭ ނަމަ އަދަބަށް ދެ ދަރަޖައިގެ ލުޔެއް ލިބޭނެ އެވެ. އެކަމަކު، ދައުވާ ކުރި ފަހުން ނަމަ ލިބޭނީ އެއް ދަރަޖައިގެ ލުޔެކެވެ.

"ގާނޫނުލްއުގޫބާތުގެ 1106 ވަނަ މާއްދާގައި އޮތީ، ކުށްވެރިޔާ ކުށާ މެދު ދެރަވާކަން އާންމުންގެ ތެރޭގައި ފާޅުކުރުމުން، އަދަބުގެ ދަރަޖަ ދަށްވާނެ ވާހަކަ އެވެ. ދައުވާކުރުމުގެ ކުރިންނަމަ، 2 ދަރަޖަ، ދައުވާ ކުރި ފަހުންނަމަ، 1 ދަރަޖައެވެ. ކުށް ސާބިތުވާކަމަށް ކަނޑައެޅި ނަމަވެސް، އަދަބު ދިނުމުގައި އިސްވެދެންނެވި އުސޫލާ ޚިލާފު ނަމަ، އެ ނުކުތާ ވަކިން އިސްތިއުނާފު ކުރަންޖެހެ އެވެ." ޝަމީމްގެ ބްލޮގްގައިވެ އެވެ.

Advertisement

ކަން މިހެން ހުރި އިރު، ނާޒިމް މާފަށް އެދި ބަޔާނެއް ނެރުނީ ދައުވާކުރިތާ މާ ފަހުން، އޭނާއަށް ހުކުމް ކުރަން އޮތް ދުވަހު އެ ޝަރީއަތް ފަށަން ގާތްވެފައި ވަނިކޮށެވެ. ވުމާއެކު އޭނާގެ އަދަބު ދެ ދަރަޖައަށް ލުއި ކޮށްފައިވާ މައްސަލަ ޕީޖީ އޮފީހުން އިސްތިއުނާފް ކުރަން ޖެހޭކަން މި ލިޔުމުން ހާމަވެއެވެ. 

ބަންގްލަދޭޝްގެ ޒުވާނެއްކަމަށްވާ އެމްޑީ އަލަމްގީރް (އަލަމްގިރި) އާއެކު އެއް ޖިންސުން ޖިންސީ ގުޅުން ހިންގި މައްސަލާގައި ނާޒިމް ސައްތާރު އަށް އައީ ތިން މަހާއި 26 ދުވަހަށް ގޭބަންދުގެ ހުކުމެކެވެ. އެހެންނަމަވެސް އެ މައްސަލާގައި ދަޢުވާ އުފުލި ފުލުސް މީހެއް ކަމަށްވާ ޢަބްދުއްރަޙްމާން ރަފީޢު (ދޮންދިގު) މައްޗަށް ކުށް ސާބިތުވެ, އޭނާއަށް އައީ އެއް އަހަރާއި ދެ މަހާއި 12 ދުވަހުގެ ޖަލު ހުކުމެކެވެ. 

އެއް ކުށެއް ކުރި ދެމީހުންނަށް އިއްވާފައިވާ ހުކުމުގެ ފަރަގު މިހާ ބޮޑުވެފައިވާއިރު ނާޒިމް ސައްތާރު ފަދައިން ރަފީއުވެސް އޭނާއަށް ހުކުމް ކުރުމުގެ ކުރިން ވަނީ ކުށަށް އިއުތިރާފްވެފައެވެ.