ވެރިކަމަށް ފައި ނަންގަވައިގެން ތިއްބެވި ބައެއް ބޭފުޅުންނަކީ އެމީހުންގެ ޟަރޫރަތްތަކާއެކު އެމީހުންގެ އިޚްލާސްތެރިކަންވެސް ބަދަލުކުރާ އެއްވެސް ބަޔަކަށް އިޚުލާސްތެރިކަމެއް ނުބާއްވާ ބައެއްގެ ގޮތުގައި ކުރީގެ ނައިބުރައީސް ޑރ. މުހައްމަދު ޖަމީލު ސިފަކުރައްވައިފިއެވެ. 

އަމިއްލަފުޅު ޚިޔާލެއްގެ ގޮތުގައި ޑރ. ޖަމީލު ވަނީ އެމަނިކުފާނު ފޭސްބުކުގައި ލިޔުއްވި ޕޯސްޓެއްގައި ވެރިކަމަށް ފައި ނަންގަވައިގެން ތިއްބެވި ބައެއް ބޭފުޅުންނަށް އަމާޒުކުރައްވާ ފާޑު ވިދާޅުވެފައެވެ. 

އެގޮތުން ޑރ ޖަމީލު ވިދާޅުވީ ބައެއް ބޭބޭފުޅުން ފުރުއްވި މަގާމުތަކުގެ ވާހަކައާއި، އެ މަގާމުތަކުގައި ތިއްބަވައިގެން ކޮށްދެއްވި ޚިދުމަތްތަކުގެ ވާހަކައާއި، ދެން ފުރުއްވަން އެދިވަޑައިގަންނަވާ މަގާމުގެ ވާހަކަ ދައްކަވާއިރު އެ ބޭފުޅުން މަގާމުތަކުގައި ތިއްބަވާ ހިންގި ކޮރަޕްޝަންއާއި މެދު ރައްޔިތުން ވިސްނާލަން ޖެހޭކަމަށެވެ. 

Advertisement

ޑރ. ޖަމީލު އެ ޕޯސްޓުގައި ވަކި ބޭފުޅެއްގެ ނަން ޖައްސަވާފައި ނެތް ނަމަވެސް އޭގައި ފާހަގަކޮށްފައިވާ މައްސަލަތަކަށް ބަލާއިރު، އެމަނިކުފާނު އެ ވިދާޅުވަނީ މޯލްޑިވްސް ނެޝަނަލް ޕާޓީ (އެމް.އެން.ޕީ) ގެ ރައީސް މުހައްމަދު ނާޒިމްގެ ވާހަކަކަން ދޭހަވެއެވެ.

އެއީ ނާޒިމު ވަނީ ވެރިކަން ކުރެއްވުމުގެ ޝައުގުވެރިކަން ފާޅުކުރައްވާފައެވެ. އޭގެ އިތުުރުން ޑރ ޖަމީލުގެ ޕޯސްޓުގައި ފާހަގަކޮށްފައި ހުރި ބައެއްކަންކަމަކީ ސީދާ ނާޒިމްއާއި ގުޅުން ހުރި ކަންކަމެވެ. 

ވެރިކަމަށް ކުރިމަތިލައްވާ ސިޔާސީ ބޭފުޅެއް (ނާޒިމް) ގެ ވަނަވަރު ހާމަކުރައްވާފައި އޮތް އެ ޕޯސްޓުގައި ޑރ. ޖަމީލު ވަނީ އޭނާ ޝާމިލުވާ ކޮރަޕްޝަންގެ ދިގު ލިސްޓެއް ލިޔުއްވާފައެވެ. 

އޭގެ ތެރޭގައި ނޫފަހީގެ ނަމުގައި ހިންގި ވައްކަމާއި، ކުނިބުނި މެލޭޝިޔާއިން ގެނެސް އެސްޓީއޯގެ ޒަމާންވީ ބްރޭންޑުތައް ދުއްވާލި މައްސަލަ އޭސީސީގައި ފައިލުކޮށްފައިވާކަން ފާހަގަކުރައްވާފައިވެެއެވެ. 

ކޮރަޕްޝަނަށް މަގުފަހިވާގޮތަށް އެމްޓީސީސީއިން ގެނައި ބަސްތަކާއި، ތަނބުރުދޫ ވިއްކާ ނޫމަޑިން ހިންގި ކޮރަޕްޝަންގެ އިތުރުން އަރުތޫރު ބްރަދާރަސްއާއި އެކީ ހިންގި ޖަރީމާތަކާއި ހިންގި އާމްސް ޑީލްތަކުގެ ވާހަކައަކީ ރައްޔިތުން ވިސްނާލަންޖެހޭ ކަމެއްކަމަށް ޑރ. ޖަމީލު ވިދާޅުވިއެވެ. 

އެމްޓީސީގެ މެނޭޖިން ޑިރެކްޓަރ އާޒިމް އަކީ އެމްއެންޕީގެ ރައީސް ނާޒިމްގެ އާއިލީ ބޭފުޅެކެވެ. ޑރ، ޖަމީލުގެ ޕޯސްޓުގައި ފާހަގަކޮށްފައިވާ ކޮންމެ މައްސަލައަކީވެސް ނާޒިމްއާއި ކޮންމެވެސް ހިސާބަކުން ގުޅުން އޮތް މައްސަލައެއްކަން ފާހަގަކުރެވެއެވެ. 

އެ ޕޯސްޓުގައި އިތުރަށް ފާހަގަކޮށްފައިވަނީ މި ސަރުކާރުގެ ހައުސިންގައި ހުންނެވީ (ނާޒިމް)ގެ ގާތް ރަހުމަތްތެރިއެއްކަމަށެވެ. އަދި އޭގެ ފައިދާ ނަގައިގެން 1.5 ބިލިއަނާއި ކައިރިކުރާ ޕްރޮޖެކްޓުތައް ހޯދައިފައިވާކަމަށާއި، އޭގެ ތެރޭގައި ފިއްކަނޑައިގެން ދާ ވަރުގެ ކޮރަޕްޝަން އެކުލެވޭކަމަށް ޑރ ޖަމީލު ވިދާޅުވިއެވެ.

ޑރ ޖަމީލުގެ ޕޯސްޓުގައި އިޝާރާތްކުރައްވާފައިވާ މީހާ (ނާޒިމް) އަކީ ބޮން ގޮއްވި ކުއްޖާ (އަދީބު) މުދައްރިސެއްގެ ގޮތުގައިވެސް ވަނީ ފާހަގަކުރައްވާފައެވެ. 

ޑރ ޖަމީލު ވިދާޅުވީ (ނާޒިމް) ފުރުއްވި މަގާމެއް ފުރުއްވާފައިވަނީ ކުރީގެ ރައީސް ޔާމީން އަބްދުލްގައްޔޫމުގެ ވެރިކަމުޔަގާއި، ކުރީގެ ރައީސް ޑރ. މުހައްމަދު ވަހީދު ހަސަންމަނިކުގެ ވެރިކަމުގައިކަމަށެވެ. 

އެއާއެކުވެސް މިހާރު އޮތް ސަރުކާރު ދިފާއުކޮށް ސަނާކިޔަމުންދަނީ މިހާރުގެ ޟަރޫރަތްތައް ބަދަލުވުމުންކަމަށް ޑރ ޖަމީލު ވިދާޅުވިއެވެ.

ވެރިކަމާއި ހަވާލުވުމަށް މަސައްކަތް ކުރަމުންދާއިރު، މޭމަތީގައި ޖައްސަވައިގެން އުޅުއްވާ މެޑަލްތައް ރަމްޒުވާ ޝަހީދުން ދިފާއުކުރެއްވި އިސްތިގުލާލުވެސް ނީލަންކިޔާ ގައުމު ދަރަނިވެރިކުރުވި މީހާއަށް ނޫނެކޭ ބުނަން ނުކެރެނީ މަޖުބޫރުވެގެން ކަމަށާއި، އެއީ އެމީހުންގެ ފޮތުގައި އަދިވެސް ބާޣީއެއްގެ ޟުރޫރަތު އޮތުމުންކަމަށް ޑރ. ޖަމީލު ވިދާޅުވިއެވެ.

އަދި ގަޓު ހުރި ނަމަ މޭމަތީގައި ހުރި މެޑަލްތައް ހައްގުވިކަން ރިޔާސީ އިންތިޚާބަށް ނުކުމެވަޑައިގެން ދައްކަވަން ވީ ނޫން ތޯ ވެސް ޑރ، ޖަމީލު ވަނީ ސުވާލުކުރައްވާފައެވެ.