މަސްވެރިކަން ތިޔާގިވާ މޫސުމުގައި އެކަށީގެންވާ ގޮތަކަށް މަސް ނުގަނެވޭ މައްސަލަ ހައްލުކުރުމަށް މަސް ކިރާ ބޯޓުތަކެއް ގެންނަކަމަށް ސަރުކާރުން ބުނި ނަމަވެސް މިހާރު މަސްވެރިކަން އަލުން ތިޔާގިވިއިރުވެސް އެ ބޯޓުތައް ހޯދިފައިނުވާކަން ސަރުކާރުން ހާމަކޮށްފިއެވެ.
މިއަދު ކުރިއަށްދާ ރައްޔިތުންގެ މަޖިލީހުގެ ޖަލްސާއަށް މަސްވެރިންގެ ހުރި ކަންބޮޑުވުންތަކާއި ގުޅިގެން ސުވާލުކުރުމަށް ފިޝަރީޒް މިނިސްޓަރ ޑރ.ހުސައިން ރަޝީދު ހަސަން ވަނީ މަޖިލީހަށް ހާޒިރުކޮށްފައެވެ.
އަދި މަސް ނުކިރޭ މައްސަލަ ފާއިތުވި އޭޕްރީލުގައި ކުރިމަތިވުމުން މަސްވެރިކަން ރަނގަޅު މޫސުން ދެން އަންނަންވާއިރަށް ވަގުތީ ހައްލުތަކާއި ދާއިމީ ހައްލުތައް ހޯދައިދޭނެކަމަށް ސަރުކާރުން ވައުދުވެފައިވާއިރު، އަދިވެސް އެހައްލު ނުގެނެވެނީ ކީއްވެތޯ ދާންދޫ ދާއިރާގެ މަޖިލިސް މެންބަރު ޔަޢުޤޫބު ޢަބްދުﷲ ސުވާލުކުރެއްވިއެވެ.
އެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ، ވަގުތީ ހައްލެއްގެ ގޮތުގައި ސަރުކާރުން މަސް ކިރާނެ އިތުރު ބޯޓުތަކެއް ގެނައުމަށް ނިންމި ނަމަވެސް މިހާތަނަށް އެ ބޯޓުތައް ގެނެވިފައިނުވާ ކަަމަށެވެ.
"ވަގުތީ ގޮތުން ތައްޔާރުވުމަށް އަޅުގަނޑުމެން މަސައްކަތްކުރީ އިތުރު ބޯޓު ހޯދަން. އެ ބޯޓުތަކެއް، [މަސްވެރިކަމުގެ] މި މޫސުން އައިރު އަދިއެއް ނުލިބޭ،" ޑރ.ޙުސައިން ރަޝީދު ވިދާޅުވިއެވެ.
މީގެ އިތުރުން ވަގުތީ ހައްލެއް ހޯދުމަށްޓަކައި ގެންނަން ނިންމި ބޯޓުތައް ނުގެނެވުނު ސަބަބުގެ އިތުރު ތަފްސީލު ހާމަކުރައްވަމުން މިނިސްޓަރ ވިދާޅުވީ، އެ ބޯޓުތައް ގަތުމަށް ބޭނުންވާ ފައިސާ ހަމަޖެހިގެން ބެލިއިރު އެ ބޯޓުތައް ގަންނަން ލިބެން ނެތް ކަމަށެވެ.
Advertisement
This content is created and paid for by advertisers and does not involve Voice Journalists
