ހދ. ނައިވާދޫ ފެނުގެ ނިޒާމް އިފްތިތާހުކޮށް ޚިދުމަތްދޭން ފަށައިފިއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ބޮޑުތިލަދުންމައްޗަށް މިއަދު ކުރައްވަމުން ގެންދަވާ ދަތުރުފުޅުގައި ނައިވާދޫއަށް ވަނީ ވަޑައިގެންފަ އެވެ.
ނައިވާދޫގައި މިއަދު އެކަމަށްޓަކައި ބޭއްވި ރަސްމިއްޔާތެއްގައި ފެނުގެ ނިޒާމްގެ ހިދުމަތް ފައްޓަވައި ދެއްވެވީ ރައީސް އިބްރާހިމް މުހައްމަދު ސާލިހެވެ.
ފެނުގެ ނިޒާމު އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މި ސަރުކާރުގެ ވިސްނުމަކީ އެއްވެސް ރަށެއް ބާކީ ނުކުރުން ކަމަށާއި ނައިވައިދޫ ފެނުގެ ނިޒާމަކީ އޭގެ މިސާލެއްކަން ފާހަގަކުރެއްވިއެވެ.
ނައިވައިދޫ ފެނުގެ ނިޒާމުގެ ދަށުން ދުވާލަކު 40 ޓަނުގެ ފެން އުފައްދާ އާރްއޯ ދެ ޕްލާންޓާއި 4.5 ކިލޯ މީޓަރުގެ ފެނުގެ ނިޒާމުގެ ވިއުގައެއް އެޅުމާއި ފެން ރައްކާކުރުމަށް 185 ޓަނުގެ ދެ ތާންގީ އަދި ވާރޭފެން ރައްކާ ކުރުމަށް 150 ޓަނުގެ ތާންގީއެއް ވަނީ ބަހައްޓާފަ އެވެ.
އެ މަސައްކަތް ސަރުކާރުން ސާސީ ކޮންސްޓްރަކްޝަން ޕްރައިވެޓް ލިމިޓެޑާއި ހަވާލުކުރީ 2019 ވަނަ އަހަރުގެ ސެޕްޓެމްބަރު މަހުގެ ތެރޭގައެވެ.
Advertisement
This content is created and paid for by advertisers and does not involve Voice Journalists
