ބްލޮގަރު ޔާމީން ރަޝީދުގެ މަރާއި ގެއްލުވާލައިފައިވާ ނޫސްވެރިޔާ އަހުމަދު ރިލްވާންގެ މަރާ ގުޅުވައި އަހަރުތަކެއް ފަހުން ދައުލަތުން ދައުވާ އުފުލާފައިވާ ތިން މީހުންގެ މައްޗަށް ހިންގާ ޝަރީއަތް ސިއްރު ޝަރިއަތެއްގެ ގޮތުގައި ކުރިއަށް ގެންދިޔުމަށް ތާވަލުކޮށްފިއެވެ. މި އަޑު އެހުން ކުރިއަށް ގެންދާނީ މިއަދު ހަވީރު 4:00 ގައެވެ. 

ނޫސްވެރިޔާ ރިލުވާނާއި ލިޔުންތެރިޔާ ޔާމީން މަރާލި މައްސަލައިގެ ދައުވާ ކުރަން ފޮނުވާފައިވަނީ، މަރު ކޮމިޝަނުން ކުރިއަށް ގެންދިޔަ ތަހުގީގުތަކަކަށް ފަހުގައި ކަމަށް ދައުލަތުން ބުނެފައިވެއެވެ.

މި މައްސަލައިގައި މިދިޔަ އޮގަސްޓް މަހުގެ އެއްވަނަ ދުވަހު ދައުލަތުން ޓެރަރިޒަމްގެ ދައުވާތަކެއް އުފުލާފައި ވަނީ އިސްމާއީލް އަބްދުއްރަހީމް (އިސޫ)، އަހުމަދު އިސްމާއިލް (ބުރު އަހަނދު) އަދި އަހުމަދު މުއާޒް (ގަޓް މުއާ) ގެ މައްޗަށެވެ.

Advertisement

މި 3 މީހުންގެ ތެރެއިން އިސޫގެ މައްޗަށް ދައުލަތުން އުފުލާފައި ވަނީ ޓެރަރިޒަމްގެ އަމަލެއް ކުރުމަށް އެހީތެރިވުމުގެ ކުށުގެ ދެ ދައުވާ އެވެ. އަހަނދަށް އުފުލާފައި ވަނީ ޓެރަރިޒަމްގެ އަމަލެއް ކުރުމަށް އެހީތެރިވުމުގެ ކުށުގެ ދައުވާ އާއި ޓެރަރިޒަމްގެ އަމަލެއް ރޭވުމުގެ ކުށުގެ ދައުވާ އެވެ. އަދި މުއާޒް މައްޗަށް ދައުލަތުން އުފުލީ ޓެރަރިޒަމްގެ އަމަލެއް ރޭވުމުގެ ކުށުގެ ދައުވާ އެވެ.

މި މައްސަލައިގެ ފުރަތަމަ އަޑުއެހުމުގެ މަޖިލީހެއް ބާއްވާފައި ވަނީ ނޫސްވެރިންނަށް ވެސް ވަދެވޭހެން ހުޅުވާލައިގެންނެވެ. އެދުވަހު ދައުލަތުގެ ވަކީލުންނާއި ދިފާއީ ވަކީލުން ވެސް އަޑުއެހުން ސިއްރު ކޮށްދޭން އެދިފައިވެ އެވެ. މައްސަލަ ބައްލަވާ ގާޒީ މުހައްމަދު މިސްބާހު އެ ދުވަހު ވަކި ގޮތެއް ނުނިންމެވި ނަމަވެސް އެ މައްސަލައިގެ ދެވަނަ އަޑުއެހުން މިވަނީ ސިއްރު ކޮށްގެން ކުރިއަށް ގެންދަން ނިންމާފައެވެ.