މި އަހަރުގެ ޖޫން މަހުގެ ފަހުކޮޅުން ފެށިގެން ޕާކިސްތާނަށް ކުރި ގަދަ ވިއްސާރައިގައި އެ ގައުމުގެ ބޮޑު ސަރަހައްދެއްގައި ފެން ބޮޑުވެ އެތައް ބަޔަކު ހާލުގައި ޖެހިފައިވާއިރު، އެގައުމުގައި ނުރައްކާތެރި ބަލިތައް މިވަނީ ފެތުރެން ފަށާފައެވެ.

އެގޮތުން އެގައުމުގައި ހާލުގައި ޖެހިފައި ތިބި މީހުންގެ މެދުގައި ބޭރަށް ހިންގުމައި ހޮޑުލުމައި ހުމާއި ޑެންގޫގެ އިތުރުން ކޮލެރާ ވެސް ފެތުރެމުންދާ ކަމަށް މީޑިއާތަކުން ވަނީ ރިޕޯޓުކޮށްފައެވެ.

ޕާކިސްތާނަށް ބޯކޮށް ވާރޭ ވެހި ބޮޑު ސަރަހައްދެއްގައި ބޮޑުވެފައިވާ ފެންގަނޑު މިހާރު ހިނދެން ފަށާފައިވި ނަމަވެސް އެ ހާދިސާގައި ގެދޮރު ހަލާކުވި އެތައް ހާސް ބަޔަކު މިހާރު ވެސް ދިރިއުޅެން ޖެހިފައިވަނީ، ސްކޫލްތަކާއި މައިދާންތަކުގައި ސަރުކާރުން ތައްޔާރުކޮށްދިން ވަގުތީ ހިޔާތަކުގަ އާއި، ހުސް ބިންތަކުގައި އެމީހުން އަމިއްލަ އަށް ހެދި ވަގުތީ ފޭލިގެތަކުގަ އެވެ.

Advertisement

ފެން ބޮޑުވުމުގެ ސަބަބުން ހަލުވި ކަމާއެކު އެގައުމުގައި ބަލިތައް ފެތުރެމުންދާއިރު، ސާފު ބޯފެން ނުލިބުމާއި، ސިއްހީ ފަރުވާ އެކަށީގެންވާ ވަރަށް ނުލިބުމުގެ ސަބަބުން ގިން ބަޔަކު ދަނީ ހާލުބޮޑުވަމުންނެވެ. ތަޣައްޔަރުވެފައިވާ ފެން ބޯން މަޖުބޫރުވުމުގެ ސަބަބުން، ގިނަ އަދަދެއްގެ ކުޑަކުދިންނަށް ވަނީ ބަލިޖެހިފައެވެ. އެގޮތުން ހޮޑުލެވުމާއި ބޭރަށް ހިންގުމާއި ރޯގާ ވެސް ވަނީ އިތުރުވެފައެވެ. އެގޮތުން އެވްރެޖްކޮށް ދުވާލެއްގެ މައްޗަށް 10 ކުޑަކުދިން ފެނުގެ ޒަރިއްޔާއިން ފެތުރޭ އެކިއެކި ބަލިތަކުގެ ސަބަބުން ދަނީ މަރުވަމުންނެވެ.

ޕާކިސްތާނަށް މިފަހަރު ކުރި ވިއްސާރައިގައި ބޯކޮށް ވާރޭ ވެހުމުގެ ސަބަބުން، އެ ގައުމުގެ އެކި ޕްރޮވިންސްތަކުން، ގާތްގަނޑަކަށް 44000 އަކަ މޭލުގެ ބޮޑު ސަރަހައްދެއް ވަނީ ފެނު އަޑީގަ އެވެ. 

މި ހާދިސާގައި އެގައުމުގެ އެކި ސަރަހައްދުތަކުން 1500 މީހުން މަރުވެފައިވާއިރު، ލިބުނު ގެއްލުންތަކުގެ އަދަދު 30 ބިލިއަން އެމެރިކާ ޑޮލަރަށް އަރާކަމަށް މީޑިއާ ރިޕޯޓުތައް ބުނެއެވެ.