އައްޑޫ ސިޓީގައި ޓުއަރިޒަމް ސިނާއަތު ފުޅާކުރުމަށް 8000 އެދުގެ ޖާގަ އުފައްދަވާނެކަމަށް ރައީސް އިބުރާހިމް މުހައްމަދު ސޯލިހުގެ ސަރުކާރުން ވީ ވައުދަށް ވީ ކިހެނެއްތޯ އައްސަވާ އިދިކޮޅު ކޯލިޝަންގެ ތަރުޖަމާނު ހީނާ ވަލީދު ސުވާލު ކުރައްވައިފިއެވެ. 

ހީނާ މިފަދައިން ސުވާލު އުފައްދަވާފައިވަނީ ތިލަދުންމަތީގައި 8000 ޓުއަރިސްޓު އެނދު ތަރައްގީކުރައްވާނެކަމަށް ރައީސް ސޯލިހު ވިދާޅުވުމާއި ގުޅިގެން ކުރެއްވި ޓްވީޓެއްގައެވެ. 

ހީނާ ވިދާޅުވީ ރައީސުލް ޖުމްހޫރިއްޔާ ރަށްރަށަށް ވަޑައިގެން ކުރައްވާނެކަމަށް ވިދާޅުވެ ރައްޔިތުންނަށް ވާ ވައުދުތަކާއި ގުޅިގެން ތަފާތު ގޮތްގޮތަށް ވާހަކަ ބަދަލުކުރައްވާކަމަށެވެ. 

އެގޮތުން ރައީސް ސޯލިހު ރަށްށަށް ކުރައްވާ ދަތުރުފުޅުތަކުގައި ވެ ވަޑައިގެންވާ ވައުދުތަކީ ފުއްދަވަން ޖެހިވަޑައިގަންނަވާ ވައުދަތެއް ނޫން ގޮތަށް އެ ޕާޓީގެ ރައީސް މުހައްމަދު ނަޝީދު ވިދާޅުވަމުން ދާއިރު، އެފަދައިން ވައުދުވަމުން ދަނީ ދިރާސާ ކުރެއްވުމަށްފަހު ވައުދު ފުއްދޭނެކަން ޔަގީން ކުރައްވާފައި ނޫންކަމަށް ސަރުކާރުގެ މިނިސްޓަރުން ވިދާޅުވާކަމަށް ހީނާ ވިދާޅުވިއެވެ. 

އެއާއެކު އޭނާ ވަނީ މި ފަދައިން ވާ ވައުދުތަކުގެ ހަގީގަތީ ކޮބައިތޯ އައްސަވާފައެވެ. 

ރައީސް ސޯލިހު ރާއްޖޭގެ އެކި ކަންނޮޅުތަކަށް ކުރައްވާ ދަތުރުތަކުގައި އެ ރަށްތަކަށް ޚާއްސަކޮށް ގިނަ ކަންތައްތަކެއް ކޮށްދެއްވާނެކަމަށް ވައުދުވެވަޑައިގަންނަވައެވެ. 

އެ ވައުދުތަކާއި ގުޅިގެން މަޖިލީހުގައި ބައެއް މެމްބަރުން ވަޒީރުންނާއި ސުވާލުވެސް ކުރައްވައެވެ. 

ދާދިފަހުން މަޖިލީހުގައި ރައީސް ސޯލިހު ވެލެއްވި ވައުދަކާއި ގުޅިގެން މެމްބަރަކު ކުރެއްވި ސުވާލަކާއި ގުޅިގެން މަޖިލީހުގެ ރައީސް މުހައްމަދު ނަޝީދު ވިދާޅުވީ ރަށްރަށުގެ ފޮތިގަނޑުތަކުގައި ދަމާފައި ހުންނަ ވައުދުތަކަކީ ފޮތިގަނޑުތަކުގައި ތައްގަނޑު ޖެހި ކުދިންގެ ވައުދުތަކެއްކަމަށެވެ. 

ސަރުކާރުން ފުއްދަން ޖެހޭނީ މެނިފެސްޓޯގައި ލިޔެފައި ހުންނަ ވައުދުތައް އެކަނިކަމަށް ދޭހަވާ މޭރުމުން ނަޝީދު ވަނީ ވާހަކަފުޅުދައްކަވާފައެވެ.