ދިވެހިރާއްޖެއަށް އަލަން އުފަންވާ ކުދިންނަށް "ސޯލިހު" އެ ނަން ކިޔުން މައިން ބަފައިން ހުއްޓާލައިފިކަމަށް މި ސަރުކާރުގެ ފުރަތަމަ ޓެކްނޮލިޖީ މިނިސްޓަރު މުހައްމަދު މަލީހު ޖަމާލު ވިދާޅުވެއްޖެއެވެ. 

މަލީހު މިފަދައިން ވިދާޅުވެފައިވަނީ ކުރެއްވި ޓްވީޓެއްގައެވެ. 

މަލީހު ވިދާޅުވީ ސޯލިހުއަކީ ޒަމާނުއްސުރެ ދިވެހިންގެ ތެރޭގައި ވަރަށް މަގުބޫލު ރީތި ނަމެއްކަމަށެވެ. 

އެހެން ނަމަވެސް އިބްރާހިމް މުހައްމަދު ސޯލިހު ވެރިކަން ކުރައްވަމުންދާ ގޮތުން ރައްޔިތުން އެ ނަން މަތިންވެސް މިހާރު ފޫހިވެފައިވާކަމަށް މަލީހު ވިދާޅުވިއެވެ. 

"ސޯލިހު" އެ ނަން ދެކެ ރައްޔިތުން ފޫހިވީ ރައީސް ސޯލިހުގެ ކިބައިގައި ވައުދު ނުފުއްދުމާއި، ގައުމަށް ގައްދާރުވުމާއި ދިވެހިވަންތަކަށް ގެއްލުވާލުމާ، ވައްކަން އާންމުކުރުމުގެ އިތުރުން ދަރަނިވެރިކުރުވުން ފަދަ ނުބައި އާދަތައް ހުރުމުންކަމަށް މަލީހު ވިދާޅުވިއެވެ.

އެއާއެކު އޭނާ ވިދާޅުވީ މިފަދަ ސިފަތައް ހުރުމަކީ "ސޯލިހުވުން" ކަމަށް މަޒާޖީ ގޮތުން ރައްޔިތުން ބުނަމުންދާކަމަށެވެ.

މިސާލު ޖައްސަވަމުން އޭނާ ވިދާޅުވީ ގައުމަށް ގައްދާރުވުމަކީ ނުވަތަ ވައްކަން އާންމުކުރުމަކީ ސޯލިހުވުންކަމަށް ރައްޔިތުން މަޒާޖީގޮތުން ބުނަމުންދާކަމަށެވެ.

ރައިސް ސޯލިހުގެ ނަންފުޅާއި ނުބައި އާދަތައް ގުޅިފައިވާތީ އަލަން އުފަންވާ ކުދިންނަށް "ސޯލިހު" އެ ނަން ކިޔަން މައިން ބަފައިން ބޭނުން ނުވާކަމަށް މަލީހު ވިދާޅުވިއެވެ.

އަދި ޒަމާނުއްސުރެ ދިވެހިންގެ ތެރޭގައި މަގުބޫލުކަން ހޯދާފައިވާ އެ ނަން މަތިންވެސް މިއަދު ރައްޔިތުން ފޫހިވެފައިވާކަމަށް މަލީހު ގެ ޓްވީޓުގައި ވަނީ ވިދާޅުވެފައެވެ.