ރާއްޖޭގައި ކުރިއަށް ގެންދާ މަޝްރޫއުތައް ނިންމުމަށް 100 މިލިއަން ޑޮލަރުގެ ކްރެޑިޓް ލައިނެއް ދިނުމުގެ އެއްބަސްވުމުގައި ރާއްޖެ އާއި އިންޑިއާއާ ދެމެދުގައި މިއަދު ސޮއިކޮށްފިއެވެ.
ފޮރިން މިނިސްޓްރީގައި ބޭއްވި ޚާއްސަ ރަސްމިއްޔާތެއްގައި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު އިބްރާހިމް އަމީރެވެ. އިންޑިއާގެ ފަރާތުން ސޮއިކުރެއްވީ އިންޑިއާގެ އެގްޒިމް ބޭންކްގެ ޖެނެރަލް މެނޭޖަރު ނިރުމިތު ވެދު އެވެ.
އިންޑިއާ އިން 100 މިލިއަން ޑޮލަރުގެ ލޯނެއް ދިނުމަށް ނިންމެވިކަން އިއުލާން ކުރެއްވީ، ރައީސް އިބްރާހިމް މުހައްމަދު ސޯލިހް މިދިޔަ އޮގަސްޓް މަހުގެ ކުރީކޮޅު އިންޑިއާ އަށް ކުރެއްވި ރަސްމީ ދަތުރުފުޅުގައި އިންޑިއާގެ ބޮޑުވަޒީރު ނަރެންދުރަ މޯދީއެވެ. މި ލޯނަކީ ރާއްޖޭގައި ކުރިއަށް ގެންދާ ގިނަ މަޝްރޫޢުތައް ނިންމުމަށް ދިނެ ލޯނުގެ އެހީއެކެވެ.
އިންޑިއާ އިން ރާއްޖޭގައި ގިނަ ޕްރޮޖެކްޓުތަކެއް ހިންގަމުންދާއިރު، މި ސަރުކާރުގެ އުމްރާނީ ތަރައްގީގެ އެންމެ ބިޔަ މަޝްރޫއު ކަމަށްވާ "ތިލަމާލެ ބްރިޖު"ގެ މަސައްކަތް ވެސް ކުރަނީ އިންޑިއާގެ ލޯނު އެހީގަ އެވެ. ސަރުކާރުން ހާމަކުރާ ގޮތުގައި އެ ޕްރޮޖެކްޓުގެ ފުރަތަމަ ފިޔަވަހި، އަންނަ އަހަރު މެދުތެރޭގައި ނިންމާލެވޭނެ އެވެ.
Advertisement
This content is created and paid for by advertisers and does not involve Voice Journalists
