ދޭދޭ ގައުމުތަކާއި، މުޖްތަމައުތަކާއި، ފަރުދުންގެ މެދުގައި އުފެދޭ މައްސަލަތައް ހައްލު ކުރާނީ "ވައިލެންޓް" ވެގެން ނޫން ކަމަށް ހޯމް މިނިސްޓަރ ޢިމްރާން ވިދާޅުވެއްޖެއެވެ. 

ޢިމްރާން މިފަދައިން ވިދާޅުވީ، ބައިނަލްއަގްވާމީ އަހިންސަ ދުވަސް (ނަން-ވައިލެންސް ޑޭ)ގެ ތަހުނިޔާ ދިވެހިންނަށް ރައްދު ކުރައްވައިދެއްވި މެސެޖެއްގައެވެ. 

އެ މެސެޖުގައި ޢިމްރާން ވިދާޅުވީ، ވިލުންވެރި މުޖްތަމައެއްގެ މައިބަދައަކީ ޖުމްތަމައުގެ ސުލްހަ މަސްލަސް ކަމާއި އަމަންއަމާން ކަމާއި ރައްކާތެރިކަން ކަމަށެވެ.

"ވިލުންވެރި މުޖުތަމައެއްގެ މައިބަދައަކީ މުޖުތަމައުގެ ސުލްޙަމަސަލަސް ކަމާއި އަމަންއަމާން ކަމާއި ރައްކާތެރިކަން. އަމަންއަމާންކަން ލިބިގެންވާ މުޖުތަމައަކީ ސަލާމަތުގެ އައްސޭރިއަށް ދަތުރު ކުރެވޭނެ މުޖުތަމައެއް. އަހިންސަ މުޖްތަމައެއް އުފެއްދޭނީ މުޖްތަމައުގެ ހުރިހާ ފަރުދުންގެ ފުރިހަމަ ބައިވެރިކަން ލިބިގެން." މިނިސްޓަރު އިމްރާން ވިދާޅުވިއެވެ.

އެގޮތުން އެކަމަށްޓަކައި ސަރުކާރާއި، ސަރުކާރު ހިމެނޭ މުއައްސަސާތަކާއި ވަކިވަކި ފަރުދުން އަހިންސައަށް މަސައްކަތް ކުރުމަކީ ކޮންމެހެން ކުރަން ޖެހޭ ކަމަށް މިނިސްޓަރު ވިދާޅުވިއެވެ.

މިއާއެކު ޢިމްރާން ވިދާޅުވީ، ދޭދޭ ގައުމްތަކާއި މުޖްތަމައުތަކާއި ފަރުދުންގެ މެދުގައި އުފެދޭ މައްސަލަތައް ހައްލު ކުރާނީ "ވައިލެންޓް" ވެގެން ނޫން ކަމަށާ، ނޮން ވައިލެންޓް ދުވަސް ފާހަގަކުރަނީ އެ ސަބަބަށްޓަކައި ކަމަށެވެ. 

މިނިސްޓަރު އިތުރަށް ވިދާޅުވީ، ބައިނަލްއަގްވާމީ ގޮތުން އަހިންސަ މުޖްތަމައެއް ގާއިމް ކުރުމުގައި ރާއްޖޭއަކީ ވެސް މުހިންމު ދައުރެއް އަދާކުރެވޭނެ ބައެއް ކަމަށެވެ. ވުމާއެކު، ދިވެހި މުޖްތަމައުއަކީ އަހިންސަ މުޖްތަމައަކަށް ހެދުމަށްޓަކައި ދިވެހިންގެ އެންމެން ބައިވެރިވުމަށް މިނިސްޓަރު އިލްތިމާސް ކުރެއްވެވިއެވެ.