ދިވެހިރާއްޖޭގެ ފަތުރުވެރިކަމުގެ ސިނާއަތަށް ދިމާވެފައިވާ އެންމެ ބޮޑު ގޮންޖެހުމަކީ އެމްއެމްޕީއާރްސީ މެދުވެރިކޮށް، ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ދޫކޮށްފައި ހުރި ބައެއް ރަށްތަކާއި ފަޅުތައް އަދިވެސް ތަރައްގީ ނުކުރެވި ހުރުން ކަމަށް ރައީސް އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ފަތުރުވެރިކަމަށް 50 އަހަރު ފުރުމުގެ މުނާސަބަތާ ގުޅުވައި ރޭ ދަރުބާރުގޭގައި ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން ރައީސް ޞާލިހު ވިދާޅުވީ، ފަތުރުވެރިކަން ތަރައްޤީކޮށް ފުޅާކުރުމުގައި އެތައް ގޮންޖެހުންތަކެއް އެބަހުރި ކަމަށާއި، އެންމެ ބޮޑު ގޮންޖެހުމަކީ، ފަތުރުވެރިކަމަށް ދޫކޮށްފައި ހުރި ބައެއް ތަންތަން، އަހަރުތަކެއް ވެގެން ދިޔައިރުވެސް ތަރައްޤީ ނުކުރެވި އޮތް އޮތުން ކަމަށެވެ. 

""އެއީ ދުރު ރާސްތާގެ ރޭވުމެއް ނެތި ދޫކޮށްފައި ހުރި ތަން ތަން. ހާއްސަކޮށް، އެމްއެމްޕީއާރްސީ މެދުވެރިކޮށް، މީގެ ހައެއްކަ އަހަރު ކުރިން ދޫކޮށްފައި ހުރި ބައެއް ރަށްތަކާއި ފަޅުތައް. އެތައް ބިލިއަން ޑޮލަރެއްގެ އަގުހުރި ރަށްތަކާއި ފަޅުތައް ބަޔަކަށް ވިއްކާލިއިރު، އެ ތަންތަނުގެ އަގުވެސް ދައުލަތަކަށް ނުލިބޭ. އެ ތަންތަނުން ދައުލަތަށް ލިބުނު ގެއްލުމުގެ ބަދަލު ހޯދުމުގެ މަސައްކަތް ޝަރުއީ ކޯޓުތައް މެދުވެރިކޮށް މި އަންނަނީ ކުރަމުން. އަދި ބައެއް ރަށްތަކާއި ފަޅުތަކުގެ މައްސަލަތައް އޭސީސީން އަންނަނީ ތަހުގީގު ކުރަމުން،" ރައީސް ވިދާޅުވިއެވެ.

އޭގެ އިތުރުން، ރައީސް ވިދާޅުވީ އަލަށް ހަދާ ރިސޯޓްތައް ތަރައްގީކުރުމަށް ބޭނުންވާނެ ފައިސާ ނުލިބުމަކީވެސް އޮތް ބޮޑު ގޮންޖެހުމެއް ކަމަށާއި، އެކަން ހައްލުކުރުމުގެ ގޮތުން ފައިސާ ހޯދައިދިނުމުގެ މަސައްކަތް ވެސް ސަރުކާރުން ކުރަމުން އަންނަ ކަމަށެވެ.

ފަތުރުވެރިކަން އިތުރަށް ފުޅާކުރުމުގައި ހުރި ހުރަސްތައް ފާހަގަކުރެއްވި ނަމަވެސް، ރައީސްގެ ވާހަކަފުޅުގައި ވަނީ ފާއިތުވެދިޔަ 50 އަހަރުގެ ތެރޭގައި ރާއްޖޭގެ ފަތުރުވެރިކަން ކުރިއަރައިގެން އައިސްފައިވާ މިންވަރަށް ވެސް އަލިއަޅުވާލައްވާފަ އެވެ.

އެގޮތުން ރައީސް ވިދާޅުވީ، ފަތުރުވެރިކަމަށް މިއަދު 50 އަހަރު ފުރޭއިރު، ރާއްޖޭގައި މިހާރު ހިނގަހިނގާ އޮތް 166 ރިޒޯޓް އެބައޮތް ކަމަށެވެ. އަދިވެސް އިތުރު ރަށްތައް ރިޒޯޓްގެ ގޮތުގައި ތަރައްޤީ ކުރަމުން އަންނަ ކަމަށާއި އެ ރިޒޯޓްތައް ހުޅުވުމުން، ރާއްޖޭގެ ރިޒޯޓްތަކުގެ ޢަދަދު، ރާއްޖޭގައި މީހުން ދިރިއުޅޭ ރަށްރަށުގެ ޢަދަދާ ދާދި އަވަހަށް އަރައި ހަމަކުރާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން އެމަނިކުފާނު ގެ މިސަރުކާރުން ފަތުރުވެރިކަމަށް ކޮށްދީފައިވާ ޚިދުމަތްތައް ފާހަގަކުރައްވަމުން ރައީސް ސޯލިހު ވިދާޅުވީ، ވޭތުވެދިޔަ ހަތަރު އަހަރުގެ ތެރޭގައި ރާއްޖޭގައި އަލަށް 33 ރިސޯޓާއި 471 ގެސްޓުހައުސް ހުޅުވާފައިވާ ކަމަށެވެ.

"އެއީ 8،385 ކޮޓަރި ނުވަތަ 16،783 އެނދު. ސީދާ އެ ތަން ތަނުން ވެސް އެތައް ހާސް ވަޒީފާއެއް އުފެދިއްޖެ އަދި އެ ތަންތަން ހުޅުވުމާ އެކު ފަތުރުވެރިކަމާ ގުޅުންހުރި އެހެން ދާއިރާތަކުން ވެސް އިތުރު އެތައް ހާސް ވަޒީފާއެއް އުފެދިފައިވާނެ،" ރައީސް ވިދާޅުވި އެވެ.