ޔޫތު މިނިސްޓަރު އަހުމަދު މަހުލޫފް އަކީ ބޮޑުކަމާއި ކިބުރުވެރި ކަމުގެ ސިފަ ގައިގައި ހުންނަ މީހެއް ނޫން ކަމަށް އޭނާ ވިދާޅުވެއްޖެއެވެ.
މަހުލޫފް މިހެން ވިދާޅުވީ، އޭނާ ލ.އަތޮޅަށް ކުރެއްވި ދަތުރުފުޅަކަށް ފަހު މާލެއަށް ވަޑައިގަންނަވަން ފުލައިޓަށް އަރާވަޑައިގަތުމުގެ ކުރިން އޭނާ ޗެކުކުރި ކައްދޫ އެއާޕޯޓުގެ އޭވިއޭޝަން ސެކިއުރިޓީ ކޮމާންޑުގެ އޮފިސަރަކު މުއްދަތެއް ނެތް ގޮތަށް ސަސްޕެންޑުކުރި ކަމަށް ބައެއް ނޫސްތަކުން ރިޕޯޓް ކުރުމާއި ގުޅިގެން އެކަމަށް ރައްދު ދެއްވައި ކުރެއްވި ޓުވީޓެއްގައެވެ.
އެވާހަކަ ދޮގުކޮށް މަހުލޫފް ކުރެއްވި ޓުވީޓެއްގައި ވިދާޅުވީ، އޭނާ ވަރަށް ގިނައިން ރާއްޖޭގެ އެކިކަންކޮޅުތަކަށް ދަތުރުކުރައްވާ ކަމަށެވެ. އަދި އެ ދަތުރު ތަކުގައިވެސް، ގަވައިދުގެ ތެރެއިން ކޮންމެ ފަހަރަކުވެސް ސެކިއުރިޓީ ޗެކް ކުރާ ކަމަށެވެ.
"މިރޭގައި ކޫއްޑޫއިން ޗެކްކުރި. ޗެކްކުރާކަން އެންމެ ރަނގަޅަށް އިނގޭނީ އެއަރޕޯޓު ތަކުގެ ސެކިއުރިޓީ އޮފިސަރުންނަށް. އަދި ދުވަހަކުވެސް އިހްތިރާމްކުޑަކޮށް މުއާމަލާތް ކޮށްފަނުވާނެ." މަހުލޫފް ވިދާޅުވިއެވެ.
އޭއާއެކު އޭނާ ވިދާޅުވީ އޭނާއާއި ގުޅިގެން ބައެއް ނޫސްތަކުން ރިޕޯޓުކޮށްފައިވަނީ ހަގީގަތެއްނޫން ކަމަށާ،ބޮޑާ ކަމާއި ކިބުރުވެރި ކަމަކީ އޭނާގެ ގައިގައި ހުންނަ ސިފައެއް ނޫންކަމަށެވެ.
"ބޮޑާ ކަމާ ކިބުރުވެރިކަމަކީ އަޅުގަނޑު ގައިގަ ހުންނަ ސިފައެއްނޫންކަން އަޅުގަނޑު ދަންނަ ކޮންމެމީހަކަށް އިނގޭނެ. ދުނިޔޭގައުޅެނީ އެވަރުދަނެގެން." މަހުލޫފު ވިދާޅުވިއެވެ.
އެމްޑީޕީގެ ހަރަކާތަކަށް ލ.އަތޮޅަށް ވަޑައިގެން އުޅުއްވުމަށް ފަހު މަހުލޫފު އެއާޕޯޓަށް ހޮނިހިރުދުވަހުގެ ހެނދުނުގެ ވަގުތެއްގައި ވަޑައިގަތީ މާލެއަށް އަނބުރާ ވަޑައިގަތުމަށެވެ. އަދި އެ ވަގުތު ޗެކުވުމަށް މިނިސްޓަރު އަރިހުން އޭވިއަޝަން ސެކިއުރިޓީގެ މުވައްޒަފު އެދުމުން އެކަމާ ހިތްޕުޅުހަމަޖެހިވަޑައިނުގެން މަހުލޫފު ވާހަކަދެއްކެވި ކަމަށް ބައެއް މީޑިއާތަކުން ވަނީ ރިޕޯޓް ކޮށްފައެވެ.
އަދި މަހުލޫފު ކައްދޫއިން ފުރާވަޑައިގެން މާލެއަށް ވަޑައިގެންނެވިތާ މާ ގިނަ ވަގުތެއް ނުވެ، އެ މުވައްޒަފު ވަޒީފާއިން ސަސްޕެންޑުކުރަން އޭވިއޭޝަން ކޮމާންޑުގެ ވެރިން ކައްދޫ އެއާޕޯޓުގެ އޭވިއޭޝަން ކޮމާންޑަށް އެންގި ކަމަށްވެސް ބައެއް މީޑިއާތަކުން ރިޕޯޓްކޮށްފައިވެއެވެ.
Advertisement
This content is created and paid for by advertisers and does not involve Voice Journalists
