ވެކްސިން ޖެހި ކުއްޖަކު ވާ ވެފައިވާކަން ފާހަގަކޮށް އެފަދަ ކުދިން ބެލެހެއްޓުމުގައި އުފުލަން ޖެހޭ ތަކުލީފުތަކުގެ ވާހަކަ އެ ހާލަތު މެދުވެރިވެފައިވާ ފަރާތެއް ހިއްސާކުރެއްވުމުން އެއީ ނޯމަލްކަމެއް ކަމަށާއި، އެއީ ވެކްސިން ޖެހުމުގެ ސަބަބުން އައި ރިއެކްޝަނެއްކަމަށް ހެލްތު މިނިސްޓަރު އަހުމަދު ނަޝީދު ވިދާޅުވެއްޖެއެވެ.

މިހާރު ކުރިއަށްދާ އެމްޑީޕީގެ ކޮންގްރެސްގައި އައްޑޫ ސިޓީ ތަމްސީލުކުރާ މަންދޫބެއްގެ ގޮތުގައި ބައިވެރިވެވަޑިއިގެން ކުރީގެ ކައުންސިލަރަކު ވަނީ އޭނާއަށް މެދުވެރިވެފައިވާ ހާލަތުގެ ވާހަކަ ހިއްސާކޮށްފައެވެ.

އެގޮތުން އޭނާގެ ދަރިފުޅަށް ޖެހި ވެކްސިނެއްގެ ސަބަބުން ކުއްޖާ ޕެރަލައިޒް (ވާ ބަލި) ވެފައިވާއިރު ކުއްޖާއަށް ބޭނުންވާ ފަރުވާ ހޯދުމަށް ރާއްޖެއިން ބޭރަށް ގެންދިއުމުގައި ކުރާ ޚަރަދުތައް މިހާރު އޮންނަ އުސޫލުތަކުގެ ސަބަބުން އާސަންދައިން ކަވަރު ނުކުރާކަން އޭނާ ފާހަގަކުރެއްވިއެވެ.

އާސަންދައިގެ އުސޫލު އަދާހަމަ ކުރަން ޖެހޭކަމަށް ދެކިވަޑައިގަންނަވާކަމަށް އޭނާ ވިދާޅުވިއެވެ. އަދި ޚާއްސަ ހާލަތްތަކަށް އާސަންދައިން ފަރުވާ ހޯދުމުގައި އިސްތިސްނާތައް ހުންނަން ޖެހޭކަންވެސް އޭނާ ފާހަގަކުރެއްވިއެވެ.

އޭނާގެ އެ ވާހަކަތަކަށްފަހު ހެލްތު މިނިސްޓަރު ނަސީމުގެ ޚިޔާލު ކޮންގްރެސްއަށް ހުށައެޅުއްވިއެވެ.

ނަސީމު ވިދާޅުވީ ވެކްސިންގެ ސަބަބުން އެކި ކަހަލަ ރިއެކްޝަންތައް އަންނަކަމަށެވެ. އެގޮތުން ވެކްސިން ޖެހުމުގެ ސަބަބުން ކުއްޖާ ވާ ވުމަކީވެސް އެފަދަ ރިއެކްޝަނެއްކަމަށް އޭނާ ވިދާޅުވިއެވެ. އަދި އެއީ ނޯމަލް ކަމެއްކަމަށް ނުވަތަ އާންމު ކަމެއްކަމަށް ނަސީމު ވިދާޅުވިއެވެ.

އެއާއެކުވެސް ނަސީމު ވިދާޅުވީ ވެކްސިނާއި ގުޅިގެން ކުދިންނަށް ކުރިމަތިވާ ސިއްހީ ހާލަތުތަކަށް ސަރުކާރުން ރިއާޔަތް ކުރަން ޖެހޭކަމަށް ގަބޫލުފުޅުކުރައްވާކަމަށެވެ.

އެއާއެކު އެފަދަ ހާލަތްތަކުގައި ކުދިންނަށް ކުރިމަތިވާ އެކި ވަރުގެ ނުކުޅެދުންތެރިކަމަށް ފަރުވާކުރުމަށް ސަރުކާރުން އެހީތެރިކަން ފޯރުކޮށްދޭން ޖެހޭކަމަށް ގަބޫލުފުޅުކުރައްވާކަމަށެވެ. އަދި އެފަދަ ހާލަތްތައް މެދުވެރިވެފައިވާ ފަރާތްތަކުން އުފުލާ ތަކުލީފތައް ކުޑަކުރުމަށް ސަރުކާރުން އެހީތެރިން ފޯރުކޮށްދޭނެކަމުގެ ޔަގީންކަންވެސް އޭނާ ދެއްވިއެވެ.