ފުށިދިއްގަރު ފަޅުން ހިއްކި ބިމުގެ 500 ހެކްޓަރު ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ސަރުކާރުން ވީ އެއްބަސްވުމަކީ، ޤާނޫނުއަސާސީއާ ޚިލާފު ނިންމުމެއް ކަމަށް ކަނޑައަޅައިދިނުމަށް ޤާނޫނީ ވަކީލު އަލީ ހުސެއިން ސުޕްރީމް ކޯޓަށް މައްސަލައެއް ހުށަހަޅައިފިއެވެ.

އަލީ ހުސެއިންގެ މައްސަލައިގައި ފާހަގަކޮށްފައިވާ ގޮތުގައި މި ނިންމުން ޤާނޫނުއަސާސީގެ 250 ވަނަ މާއްދާއާ ފުށުއަރައެވެ. ހަމައެހެންމެ، އެ ތަންތަން ތިންވަނަ ފަރާތަކަށް ވިއްކި ނަމަވެސް ނުވަތަ ވާރުތައިން ލިބުނު ނަމަވެސް އިތުރު 99 އަހަރުގެ މުއްދަތެއް އާ ވެރިފަރާތަށް ލިބޭ ގޮތަށް އެއްބަސްވުމުގައި ހިމަނާފައިވާ ޝަރުތަކީ ޤާނޫނުއަސާސީގެ 251 ވަނަ މާއްދާގެ (ށ) އާ ތައާރުޒުވާ ކަމެއް ކަމަށް ވެސް ބަޔާންކޮށްފައިވެއެވެ. ކޯޓުން ވަކި ގޮތެއް ނިންމެންދެން އެ އެއްބަސްވުމުގެ ދަށުން ހިނގާ ހުރިހާ މުއާމަލާތެއް މެދުކަނޑައިލުމުގެ ވަގުތީ އަމުރެއް ނެރެދިނުމަށް ވެސް އޭނާ ވަނީ އެދިފައެވެ.

މީގެ އިތުރުން، ގާނޫނުއަސާސީއާ ހިލާފަށް ކުރާ ކޮންމެ ކަމަކީ ބާތިލު ކަމެއްކަމަށް ގާނޫނުއަސާސީގެ 268 ވަނަ މާއްދާގައި ކަނޑައަޅާފައި އޮތް އޮތުމަށް ރިއާޔަތްކޮށް ދެންނެވުނު އެއްބަސްވާއި އެ އެއްބަސްވުން އެކުލަވައިލުމަށް ނިންމި ނިންމުން ބާތިލު ކަމަށް ކަނޑައަޅައިދިނުމަށް އަލީ ހުސެއިން ހުށަހެޅުއްވި މައްސަލައިގައި ބުނެފައިވެއެވެ.

ރަސްމާލޭއިން ބައެއް ތަރައްޤީކުރުމަށް ޔޫއޭއީގެ އީގަލް ހިލްސްއާ ސަރުކާރުން ވަނީ އެއްބަސްވުމެއް ޤާއިމްކޮށްފައެވެ. އެގޮތުން، މިއީ ރިސޯޓެއް ދޫކުރާ ފަދައިން ދޫކުރި ތަނެއް ކަމަށާއި މި އިންވަސްޓްމަންޓުގެ ސަބަބުން ރާއްޖޭ ނުދެކޭ ފަދަ އާމްދަނީއެއް ރާއްޖެއަށް ލިބޭނެކަމަށް ސަރުކާރުން ވަނީ ބުނެފައެވެ.