ތުއްތު ކުދިންނަށް ދީފައިވާ ވެކްސިންތައް އޮންލައިންކޮށް ބެލޭނެ ޕޯޓަލް އެއް މިއަދު ތައާރަފްކޮށްފިއެވެ.

މީރުމާ ހޮޓެލްގައި މިއަދު ބޭއްވި ޚާއްސަ ރަސްމިއްޔާތެއްގައި އެ ރެޖިސްޓްރީ ލޯންޗްކޮށްދެއްވާފައި ހެލްތް މިނިސްޓަރު އަހުމަދު ނަސީމެވެ.

އިލެކްޓްރޯނިކް އިމިއުނައިޒޭޝަން ރެޖިސްޓްރީ އަކީ ދުނިޔޭގެ ސިއްޙަތު ޖަމިއްޔާއާއި ޔުނިސެފްގެ އެހީ އާއި އެކު، ރާއްޖޭގެ ހުރިހާ ވެކްސިނޭޝަން ސެންޓަރުތަކުން ތުއްތުކުދިންނަށް ދެވޭ ވެކްސިނޭޝަންގެ މައުލޫމާތުތައް އެއް ޑިޖިޓަލް ޕްލެޓްފޯމެއްގައި ރައްކައުތެރިކޮށް އެކްސެސްވެ، ބެލެހެއްޓުމަށް މަގު ފަހި ކޮށްދޭނެ ނިޒާމެކެވެ.

Advertisement

މިއީ، ދުނިޔޭގެ ބައެއް ޤައުމުތަކުގައި ވެކްސިނާއި އެހެނިހެން ސިއްހީ ކަންކަމާގުޅޭ ތަފާސްހިސާބުތައް ބެލެހެއްޓުމަށް ބޭނުންކުރާ ޑީއެލްއައިއެސް 2 ޕްލެޓްފޯމްގެ ބައެއްގެ ގޮތުގައި ތައާރަފްކުރެވުނު ޑިޖިޓަލް ރަޖިސްޓްރީއެކެވެ.

އެ ރަޖިސްޓްރީ މެދުވެރިކޮށް ތުއްތު ކުދިންގެ ވެކްސިނޭޝަންގެ މައުލޫމާތު ޓްރެކްކޮށް، އެކި ސެންޓަރުތަކުން ކުއްޖާއަށް ދެވޭ ވެކްސިންގެ މައުލޫމާތު އެއް ރެކޯޑަކުން ފެންނާނެ ކަމަށް ހެލްތު މިނިސްޓްރީން ބުނެއެވެ. އެގޮތުން، ކުއްޖާ ވިހެއިރުއްސުރެން ފެށިގެން ދެވޭ ހުރިހާ ވެކްސިންތަކުގެ މައުލޫމާތު އެއްތަނަކުން ފެންނަން ހުންނާނެ އެވެ.

އޭގެ ސަބަބުން ވެކްސިނޭޝަން ސެންޓަރުތަކުން ކުއްޖަކަށް ދީފައިވާ ވެކްސިން ކަށަވަރުކުރުމުގައި މިހާރު ދިމާވާ ގޮންޖެހުންތަކަށް ލުއެއް ލިބިގެންދާނެ ކަމަށް މިނިސްޓްރީން ބުނެއެވެ. އޭގެ އިތުރުން، ގައުމީ އިމިއުނިޒޭޝަން ޕްރޮގްރާމަށް ބޭނުންވާ މައުލޫމާތު ހޯދަން އިތުރަށް ފަސޭހަވެ، ރާއްޖޭގެ ވެކްސިން ކަވަރޭޖް ނުވަތަ ވެކްސިން ފުރިހަމަކޮށްފައިވާ ކުދިންގެ އަދަދު ވަގުތުން ދެނެގަތުމަށް ފަސޭހަވެގެންދާނެ ކަމަށް ވެސް މިނިސްޓްރީން ބުނެއެވެ.