ތައުލީމީ ދާޢިރާއަށް އަންނަ ކޮންމެ އިންގިލާބީ ބަދަލެއްގެ ފަހަތުގައި ތިބެނީ މުދައްރިސުން ކަމަށާއި، އެކަން އަޅުގަނޑުމެންނަސް ކަށަވަރުވެފައިވާ ކަމަށް އެޑިއުކޭޝަން މިނިސްޓަރ ޑރ.އާއިޝަތު އަލީ ވިދާޅުވެއްޖެއެވެ.

މިނިސްޓަރ މިހެން ވިދާޅުވީ މިއަދު ފާހަގަކުރަމުންމިދާ މުދައްރިސުންގެ ދުވަހާއި ގުޅިގެން ދެއްވި ހިތާބުގައެވެ.

މިނިސްޓރަ ވިދާޅުވީ، މުދައްރިސް ކަމަކީ އެކަމުގެ އަސަރު އެތައް ޒަމާނަކަށް ދެމިގެންދާ މަތިވެރި ގަދަރުވެރި މަސައްކަތެއް ކަމަށާއި، އަޅުގަނޑުމެންގެ ތެރެއިންވެސް ކުރިއަރައި ދިޔަ ފަރާތްތައް ކުރިއަރައި ދިޔަ ސަބަބަކީވެސް މުދައްރިސުން ކަމަށެވެ.

މިނިސްޓަރު ވިދާޅުވީ ކޮންމެ ބޭފުޅަކަށްވެސް އަދި ކުއްޖަކަށްވެސް އަޅުގަނޑުމެންގެ ފިކުރު ހޭލައްވާލައި، ފޮރިވިފައިވާ ފަންނުވެރިކަމާ ގާބިލްކަން ހާމަކޮށްދެއްވި މުދައްރިސަކާ ނުވަތަ މުދައްރިސުންނާ ބައްދަލުވެފައިވާނެކަމަށެވެ.

 ހަލުވި ދުވެއްޔެއްގައި ތަރައްޤީވަމުންދާ ދުނިޔެއަށް ހޭލުންތެރިވެފައިވާ ދަރިވަރުން ބިނާ ކުރުމުގެ މައްޗަށް އަލިއަޅުއްވާލައްވަމުން މިނިސްޓަރ ވިދާޅުވީ، ހަލުވި ދުވެއްޔެއްގައި ތަރައްޤީވަމުންދާ ދުނިޔެއަށް ހޭލުންތެރިވެފައިވާ ދަރިވަރުން ބިނާ ކުރުމަށްޓަކައި ކިޔަވައިދިނުމުގެ ވައްޓަފާޅިއަށްވެސް މިހާރ ބަދަލުތަކެއް ގެންނަން ޖެހިފައިވާ ކަމަށެވެ. 

އެގޮތުން އިހުގައި ޗޯކާއި ބޯޑުން ފުދުނުކަމުގައިވިޔަސް އަދުގެ ދަރިވަރުންނަށް ބޭނުންވަނީ ފަންނުވެރިކަމާއި ޓެކްނޮލޮޖީއާއި، އުފެއްދުންތެރިކަމުގެ ހުނަރު ކަން މިނިސްޓަރު ފާހަގަ ކުރެއްވިއެވެ.

މި އަހަރުގެ މުދައްރިސުންގެ ދުވަހުގެ ޝިޔާރެއްގެ ގޮތުގައި ޔުނެސްކޯއިން ޚިޔާރުކުރީ The transformation of education begins with teacher މި ޝިޔާރެވެ.