ރާއްޖޭގައި ކެސީނޯ އަޅަން ތާއީދު ނޫން ކަމަށާއި އެކަމަށް ވަކާލާތު ވެސް ކުރައްވާފައި ނުވާނެ ކަމަށް ޔޫތު މިނިސްޓަރ އަހުމަދު މަހްލޫފް މިއަދު ވިދާޅުވެއްޖެއެވެ.
ރާއްޖޭގައި ކެސިނޯ ހިންގެން ޖެހޭ ކަމަށް ވިދާޅުވެ، ރައްޔިތުންގެ މަޖިލިހުގެ ކާށިދޫ ދާއިރާގެ މެމްބަރު ޖާބިރު ތަކުރާރުކޮށް ދައްކަވާ ވާހަކައަށް ރައްޔިތުންގެ މަޖިލިހުގެ ރައީސް މުހައްމަދު ނަޝީދާއި ޔޫތު މިނިސްޓަރު މަހްލޫފް، ހިތްވަރު ލިބޭ ފަދަ ގޮތަކަށް އިއްޔެ މަޖިލިހުގައި ވަނީ ވާހަކަ ދައްކަވައިފައެވެ.
އެ ވާހަކަތަކާއި ގުޅިގެން އެދެބޭފުޅުންނަށް ބައެއް މީހުންގެ ފާޑުކިޔުންތައް އަމާޒުވެފައިވާއިރު، މަހުލޫފު މިއަދު ކުރެއްވި ޓުވީޓެއްގައި ވިދާޅުވީ، އެބޭފުޅާއަކީ ކެސީނޯ އަޅަން ތާއީދު ކުރައްވާ އަދި އެކަމަށް ޝައުގުވެރިވެވަޑައިގަންނަވާ ބޭފުޅެއް ނޫން ކަމަށެވެ. އަދި އެކަމަށް ވަކާލާތު ކުރައްވާފައި ވެސް ނުވާނެ ކަމަށް މަހްލޫފް ވިދާޅުވިއެވެ.
އެހެން ނަމަވެސް އިއްޔެ އޮތް ރައްޔިތުންގެ މަޖިލީހުގެ ޖަލްސާގައި މަހުލޫފް ވިދާޅުވީ، ރާއްޖޭގެ ރިސޯޓުތަކުގައި ކެސިނޯ ހިންގުމާ ގުޅޭ ގޮތުން މަޝްވަރާކުރެވެންޖެހޭކަމަށެވެ. އަދި ކެސިނޯގެ ނަން ބުންޏަސް އަދި އެ ވާހަކަ ދައްކަވަން ފެއްޓެވިއަސް އެ ވާހަކަދައްކަވާ ބޭފުޅުން ގޯސްވެ ކުށްވެރިވާ ކަމަށްވެސް މަހުލޫފް ވިދާޅުވިއެވެ.
މަހްލޫފް މިހެން ވިދާޅުވެފައިވާއިރު، އެ ޖަލްސާގައި ރައްޔިތުންގެ މަޖިލީހުގެ ރައީސް ވަނީ ކެސީނޯ ލައިސަންސް ދިނުމާ ގުޅޭ ގޮތުން ތަކުރާރުކޮށް ވަރަށް ގިނައިން ސުވާލު އަންނަ ކަމަށް ވިދާޅުވެފައެވެ. އަދި ކެސީނޯ ލައިސަންސް ދިނުމަކީ އެއްވެސް ގަވައިދަކުން މަނާކުރާ ކަމެއް ނޫން ކަމަށް އެމަނިކުފާނު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
