މި އަހަރުގެ ޖޫން މަހު އައްޑޫގައި ހިންގި ގްރޫޕް މާރާމާރީތަކުގައި މީހަކު މަރާލި މައްސަލާގައި ހަތަރު ކުޑަކުއްޖެއްގެ މައްޗަށް ދައުވާކޮށްފިއެވެ.

އެ ހަތަރު ކުދިންގެ މައްޗަަާށް ދައުވާކޮށްފަިއވަނީ މި އަހަރުގެ ޖޫން މަހުގެ ތެރޭގައި އައްޑޫ ސިޓީގައި ސ. ފޭދޫ، ސޮލިޑް، މުޙައްމަދު ޒަޔާން މޫސާއަށް ތޫނުއެއްޗަކުން ޙަމަލާދީ މަރާލި މައްސަލާގައެވެ. އެ މައްސަލާގައި ހަތަރު ކުދިންގެ މައްޗަށް ވަނީ ދައުވާ އުުފުލައިފައެވެ.

އެ ހަތަރު ކުދިންގެ ތެރެއިން އެއް ކުއްޖަކަށް ކޮށްފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު ގެ ދަށުން ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދައުވާއެވެ. އަނެއް ތިން ކުދިންގެ މައްޗަށް ކޮށްފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާއެވެ.

މިމައްސަލައާއި ގުޅިގެން ޕީޖީ އޮފީހުން މިއަދު ބުނީ މި މައްސަލައިގައި ތޫނުއެއްޗެއް ބޭނުންކޮށްގެން ޤަޞްދުގައި މީހަކު މެރުމުގައި އެހީތެރިވުމުގެ ކުށުގެ ދައުވާ ލިބޭ ތިން ކުދިންގެ ތެރެއިން ދެ ކުއްޖަކު ކުށަށް އިއުތިރާފުވެފައިވާކަމަށެވެ. އަދި ޑައިވާރޝަން ފުރުޞަތަށް އެދިފައިވާތީ ކުޑަކުދިންގެ ޢަދުލުގެ ޤާނޫނުގެ ދަށުން ޑައިވާރޝަން އެގްރީމެންޓް ހެދިފައިވާކަމަށްވެސް ޕީޖީ އޮފީހުން ބުނެއެވެ.

މީގެއިތުރުން މިމައްސަލައިގައި ތުހުމަތުކުރެވޭ އުމުރުން 18 އަހަރުން މަތީގެ ފަސް މީހެއްގެ ބައި ފުލުހުން ތަހުގީގު ކުރަމުންދާ ކަމަށްވެސް ޕީޖީ އޮފީހުން މައުލޫމާތު ދެއެވެ. އަދި އެ މައްސަލަ ތަޙުޤީޤުކުރުމުގެ މުއްދަތު ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން ޕީޖީ އޮފީހުން އިތުރުކޮށްދެމުން އަންނަކަމަށްވެސް އެ އޮފީހުން ބުންޏެވެ.